Ձեր վստահելի աղբյուրը

Հունիսի 16-ին և հուլիսի 7-ին ադրբեջանական զինուժի արկակոծության, արձակած  հաստոցավոր հակատանկային նռնականետերի հետևանքով տարբեր աստիճանի բեկորային վիրավորումներ ստացած զինծառայողներն ապաքինվում են: Այս մասին Panorama.am-ի  թղթակցի հետ զրույցում ասաց ՀՀ ՊՆ Բուժծառայության վարչության պետ Կամավոր Խաչատրյանը:

Նրա խոսքերով՝ հունիսի 16-ին վիրավորված բոլոր զինվորներն էլ այսօր հիվանդասենյակում են,  նրանց  առողջական վիճակը գնահատվում է բավարար:

Նշենք, որ պայմանագրային զինծառայող Մյասնիկ Հովհաննիսյանն այդ օրը  հակառակորդի կրակոցից աչքի վիրավորում և այրվածքներ էր ստացել:  Նրան տեղափոխել էին Մալայանի անվան ակնաբուժական կենտրոն, որտեղ վիրահատել էին։ Վտանգավոր է եղել հատկապես մեկ աչքի բավական մեծ ներակնային օտար մարմինը։ Այն հաջողությամբ հեռացվել է, իրականացվել է լազերային բուժում։ Զինծառայողի մեկ աչքի տեսողությունն արդեն վերականգնվել է, մյուսի բուժումը դեռ շարունակվում է: Նա թեև դուրս է գրվել հիվանդանոցից, սակայն շարունակում է մնալ բժիշկների հսկողության տակ:

Ինչ վերաբերում է հուլիսի 7-ին վիրավորված զինծառայողներին, Կամավոր Խաչատրյանը հայտնեց, որ զինվորներից մեկը հիվանդասենյակում է, իսկ մյուսը՝ Ռոբերտ Գասպարյանը, դեռևս վերակենդանացման բաժանմունքում  է, սակայն առողջական վիճակը գնահատվում է կայուն՝ դրական դինամիկայով:

Հիշեցնենք, որ հուլիսի 7-ին վիրավորված զինվորներից  մեկը, որը վնասվածք էր ստացել ոտքի շրջանում, բուժումը շարունակում է Ստեփանակերտի հոսպիտալում: