Ձեր վստահելի աղբյուրը

«Լրագրողների մասով մեկ մեղադրանք է առաջադրվել: Սա ցույց է տալիս, որ իրավապահ մարմինների, առհասարակ իշխանության ձեռնարկած գործողություններն ամենևին էլ համաչափ չեն բռնությունների այն ծավալներին, որոնց ականատեսը մենք եղանք»,-«Մեդիա կենտրոնում» «Լրագրողների նկատմամբ բռնությունները Սարի թաղի դեպքերի ժամանակ. գնահատականներ մեկ տարի անց» թեմայով քննարկմանն ասաց «Խոսքի ազատության պաշտպանության կոմիտեի» նախագահ Աշոտ Մելիքյանը:

Նրա խոսքով, այս մոտեցումը բավականին ֆորմալ է, մեծ հաշվով կրկնում է այն, ինչ «Էլեկտրիկ Երևանի» գործով է տեղի ունենում, այնտեղ էլ որևէ տեղաշարժ տեսանելի, նկատելի չկա, գործը կոծկելու միտում է նկատվում:

«Սա անակնկալ չէ, տարիներ շարունակ իշխանությունները մատների արանքով են նայել լրագրողների նկատմամբ բռնություններին և խոչընդոտումներին: Այս պայմաններում, իհարկե, կարծես թե կանաչ լույս է վառվում ապագա նմանատիպ իրավիճակներում նույնպիսի վերաբերմունքը կրկնվելու համար: Սա շատ մտահոգիչ է: Կարծում եմ՝ միջազգային  կազմակերպություններն իրենց փաստաթղթերում այս ամեն ինչն արձանագրում են»,- նշեց Ա. Մելիքյանը:

Նա ասաց, որ իրենց գլխավոր մտահոգության առարկան այն է, որ անգործություն է դրսևորվում այս գործով:

Քննարկմանը ներկա  «Իրավունքների պաշտպանություն առանց սահմանների» ՀԿ նախագահ Հայկուհի Հարությունյանն ասաց, որ 2015 թվականի հունիսի 23-ին և 2016 հուլիսյան իրադարձության ժամանակ ոստիկանության ծառայող աշխատակիցները,  որոնք պատասխանատվության են ենթարկվել, շատ փոքրաթիվ են այն վնաս կրած լրագրողների քանակի համեմատությամբ: Նա նշեց, որ այս պահին չկան նույնականացված անձիք, որոնցով հնարավոր լինել առերեսում անել, պարզել նրանք են հարվածներ հասցողը, թե ոչ:

«Անգործություն է, քննություն որպես այդպիսին որևէ ձևով առաջընթաց չունի, քննություն չի իրականացվում, առհասարակ որևէ քայլ չկա: Կա իմիտացիա մի քանի քավության նոխազ քաղաքացիական անձանց առնչությամբ, որպեսզի գոնե վիճակագրությամբ ցույց տրվի, որ ունենք երկու դատավճիռ, որ անձիք ենթարկվել են պատասխանատվության»,- ասաց Հայկուհի Հարությունյանը: