Ձեր վստահելի աղբյուրը

Բաքվում ՌԴ դեսպանատունն անհրաժեշտ աջակցություն կցուցաբերի  Ադրբեջանում դատապարտված Ռուսաստանի և Իսրայելի քաղաքացի, բլոգեր Ալեքսանդր Լապշինին, եթե նա արտահանձնման հետ կապված դիմում ներկայացնի: Ռիա նովոստիի հաղորդմամբ, այս մասին հայտնել է  Ադրբեջանում ռուսական դեսպանատան մամուլի խոսնակ Դենիս Ապաշկինը:

«Դեսպանատուն կապի մեջ է Լապշինի փաստաբանի և նրա հարազատների հետ: Մենք մեզ իրավասու չենք համարում մեկնաբանել ադրբեջանական դատարանի վճիռը: Դեսպանատունը հետագայում էլ իր լիազորությունների շրջանակում կմասնակցի  Լապշինի իրավունքների պաշտպանության գործին»,-հայտարարել է Ապաշկինը:

Մեկնաբանելով Լապշինի հնարավոր արտահանձնումը Ռուսաստան՝ դեսպանատան մամուլի խոսնակը  հիշեցրել է, որ «Ռուսաստանի Դաշնության և Ադրբեջանի Հանրապետության միջև պայմանագիր է կնքվել դատապարտյալների փոխանցման մասին՝ պատիժն իրենց քաղաքացիության երկրում կրելու համար»:

«Եթե Ալեքսանդր Լապշինը ցանկանա օգտվել այդ պայմանագրի առաջարկած հնարավորությունից, ապա դեսպանատունը նրան անհրաժեշտ աջակցություն կցուցաբերի», - ընդգծել է նա:

Հիշեցնենք, որ Արցախ այցելած Իսրայելի ու Ռուսաստանի քաղաքացի հանդիսացող բլոգերին ձերբակալեցին Բելառուսի մայրաքաղաք Մինսկում, ապա հանձնեցին Բաքվին: Պատճառն այն է, որ  Արցախ այցելելուց հետո նրան արգելված էր այցելել Ադրբեջան, իսկ Լապշինը կարողացել էր մուտք գործել այդ երկիր Ուկրաինայի անձնագրով: Այս տարվա հուլիսի 20-ին ադրբեջանական դատարանի որոշմամբ  նա դատապարտվել է երեք տարվա ազատազրկման։