Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում այսօր շարունակվում է ՊՊԾ գնդի  գրավման 14 անդամների՝  Աշոտ Պետրոսյան, Արայիկ Խանդոյան, Արեգ Կյուրեղյան, Արմեն Բիլյան, Արմեն Լամբարյան, Գագիկ Եղիազարյան, Էդվարդ Գրիգորյան, Մխիթար Ավետիսյան, Պավել Մանուկյան, Սեդրակ Նազարյան, Սմբատ Բարսեղյան, Վարուժան Ավետիսյան, Կարո Եղնուկյան, Խաչատուր Գիչյան, գործով դատական նիստը: Սակայն նիստը մի քանի րոպե տևեց. Դատարանը գնաց խորհրդակցական սենյակ՝ ամբաստանյալներից մի քանիսի պաշտպանների նկատմամբ դատական սանկցիա կիրառելու վերաբերյալ որոշում կայացնելու, քանի որ նրանք  ներկա չէին նիստին:

Նշենք, որ դատը ընթանում է ուղիղ հեռարձակմամբ:

Ներկա պաշտպանները հայտնեցին, որ նրանք դատարանի տարածքում են, չեն մտել նիստերի դահլիճ, քանի որ դատական կարգադիչներին թույլ չեն տվել իրենց խուզարկել:

Նիստը նախագահող դատավոր Արտուշ Գաբրիելյանն ասաց. «Սա արդեն 6-7-րդ դատական նիստն է, նույն բանն ամեն անգամ ասում ենք, կրկնում ենք: Այս ամբաստանյալները ի՞նչ մեղավոր են, ամեն դատական նիստին գալիս են, պաշտպաները չեն մասնակցում, գնում ենք խորհրդակցական  սենյակ, սանկցիա ենք կիրառում, տղաներին իջեցնում ենք ներքև, հետո նորից հանում ենք վերև: Ամեն անգամ գալիս ենք այստեղ, որևէ գործողություն չենք կատարում»: