Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում ՊՊԾ գնդի գրավման 14 անդամի գործով դատավարության ժամանակ ամբաստանյալ Պավլիկ Մանուկյանի նկատմամբ դատավոր Արտուշ Գաբրիելյանը կիրառեց դատական սանկցիա՝ 10 ժամով հեռացնելով դատական նիստերի դահլիճից:

Մինչ սանկցիա կիրառելը, Պ. Մանուկյանը ցանկանում էր հանդես գալ հայտարարությամբ, դատավորը թույլ չէր տալիս: Պ. Մանուկյանն ասաց. «27 տարի առաջ ես զենք վերցրեցի ի սեր ճնշված մեր ազգի …»:

Դատավորն ընդհատեց նրան՝ ասելով, որ տեղից չխոսել առանց իր թույլտվության, հարգալից լինել օրենքի, դատարանի առջև:

«Ընդհակառակը, ես փորձում եմ ամեն կերպ հարգալից վերաբերվել ձեր հանդեպ, բայց դուք…»,- արձագանքեց Պ. Մանուկյանը:

Դատավորն ասաց. «Երբ որ թույլ կտամ Պավել Մանուկյան, այն ժամանակ կխոսեք, եղավ: Մի խագարեք դատական նիստի բնականոն ընթացքը»:

«Չեմ խանգարում: Ես անցած անգամ էլ ասացի՝ թույլ տվեք, ասեցիք՝ չէ»,- հիշեցրեց ամբաստանյալը:

«Եթե շարունակեք խոսել, ձեր նկատմամբ նորից կկիրառվի դատական սանկցիա»,- ասաց դատավորը:

«Ես էլ ձեր նկատմամբ սանկցիա կկիրառեմ»,- արձագանքեց Պ. Մանուկյանը:

Դատավորը հայտարարեց, որ կիրառում է ամբաստանյալի նկատմամբ դատական սանկցիա՝ այս անգամ նախազգուշացում: Պ. Մանուկյանը հետաքրքրվեց, թե երբ են թույլ տալու հանդես գա հայտարարությամբ: Դատավորն ասաց, երբ որ հայտարարության  ժամանակը գա:

«Ես սանկցիայից չեմ վախենում, պարոն Գաբրիելյան: Ես մահվան երախ եմ մտել, դուրս եկել, ինձ վախեցնելու ոչինչ չկա»,- նշեց ամբաստանյալը:

«Եթե մի բառ էլ ասեք, կիրառելու եմ»,- հայտարարեց Ա. Գաբրիելյանը:

«Բայց արդեն կամայականություն է…»,- նշեց Պ. Մանուկյանը:

Դատավորը հայտարարեց, որ Պ. Մանուկյանի նկատմամբ դատարանին չհարգելու համար կիրառվում է դատական սանկցիա՝ 10 ժամով հեռացում դատական նիստերի դահլիճից:

Պավլիկ Մանուկյանն ասաց. «Ես իմ պաշտպաններին արգելում եմ այստեղ գտնվել իմ բացակայության ընթացքում, եթե գտնվեն, բողոքով կդիմեմ Փաստաբանների պալատին: 

Եթե իմ հանդեպ սանկցիա եք կիրառում, ուրեմ ես այստեղ դատարան չեմ տեսնում, անվանակոչում եմ ձեզ որպես ցռան մոզի: Հերիք եղավ, զզվացրեցիք»:

Դատավորը հայտարարվեց ընդմիջում: