Ձեր վստահելի աղբյուրը

Ուկրաինայի Գերագույն ռադայի «Արմատական կուսակցության» պատգամավոր Իգոր Մոսիյչուկը պնդում է, որ Օդեսայի նախկին նահանգապետ Միխեիլ Սաակաշվիլուն զրկել են Ուկրաինայի քաղաքացիությունից: Ռիա նովոստիի հաղորդմամբ, նա նշել է, որ դա վկայում է այն մասին, որ նախագահ Պ. Պորոշենկոն «սկսել է ընդունել սեփական սխալները»:

«Նա անօրինական կերպով նրան շնորհեց քաղաքացիություն և հիմա ուղղում է բացառապես սեփական սխալները: Վրացական շապիտո-կրկեսի հյուրախաղերը ձգձգվել են և սկսել են սպառնալ ուկրաինական պետությանը»,- Ֆեյսբուքի իր էջում գրել է պատգամավորը:

Միաժամանակ նա չի հստակեցրել իր ունեցած տեղեկատվության աղբյուրը: Ռիա նովոստին գրում է, որ  Ուկրաինայի միգրացիոն ծառայությունը հաստատել է՝ Սաակաշվիլին զրկվել է Ուկրաինայի քաղաքացիությունից  այն ստանալու ժամանակ կեղծ տվյալներ տրամադրելու համար:

Ավելի վաղ Սաակաշվիլին պնդել էր, որ, ըստ ուկրաինական օրենքի,  չեն կարող իրեն զրկել քաղաքացիությունից, քանի որ այլ երկրի անձնագիր չունի:

Հիշեցնենք, որ Սաակաշվիլին լքել էր Վրաստանի 2013 թվականին  նոր նախագահի ընտրվելուց հետո: Վրաստանի դատախազությունը նրա նկատմամբ մի քանի քրեական գործ էր հարուցել: 2015 թվականին Ուկրաինայի նախագահ Պորոշենկոն նրան տրամադրել է Ուկրաինայի քաղաքացիություն, նշանակել Օսեդայի նահանգապետ: 2016 թ. նոյեմբերին Սաակաշվիլին հրաժարական է տվել նահանգապետի պաշտոնից՝ հայտարարելով, որ ուկրաինական իշխանությունները չեն ցանկանում պայքարել կոռուպցիայի դեմ: