Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում ՊՊԾ գնդի գրավման 14 անդամի գործով դատավարության ժամանակ՝ ընդմիջումից հետո, նախագահող դատավոր Արտուշ Գաբրիելյանն ասաց, որ ոստիկանության աշխատակիցների հաղորդմամբ, նիստի դահլիճ մտնելիս ամբաստանյալ Կարո Եղնուկյանը ձեռքում ունեցել է ջրի շիշ:

«Ձեզ զգուշացրել են, որ շշով չի կարելի ներկայանալ դատական նիստին: Չեք կատարել նրանց պահանջը: Քանի որ դրսում շոգ է, մենք համապատասխան ջրի ապարատ ենք տեղադրել նիստերի դահլիճում, որպեսզի ցանցակողները օգտվեն: Ներկա պահին խնդրում եմ ձեր ձեռքի շիշը տրամադրեք ոստիկանության աշխատակիցներին: Սա ձեզ համար բուֆետ չէ,  որ բոլորը շշերը ձեռքերը վերցրած գան դատական նիստի դահլիճ»,-նշեց դատավորը:

Փաստաբան Տիգրան Հայրապետյանն ասաց, որ առարակություն է ներկայացնում նախագահող դատավորի գործողություններին:

Դատավոր Գաբրիելյանը նշեց, որ փաստաբանին ձայն չի տալիս:

Ամբաստանյալ Կարո Եղնուկյանն ասաց, որ ինքը միշտ ջուր է բերել իր հետ, իր համար ջուր խմելը շոգին՝ դեղ է:

«Սա թորած ջուր է, որը տանից են ինձ բերում: Առանց այս շշի դատարան չեմ մտնում»,- հավելեց նա:

Այնուհետև դատավորը նշեց, որ եթե թորած ջուր է, կարող է դնել այն կողմում, անհրաժեշտության դեպքում «տղաները կլցնեն բաժակի մեջ, կտան»:

Կ. Եղնուկյանն արձագանքեց. «Այդ շիշն իմ մոտից ուրիշ տեղ չի գնալու»:

Դատավորը հայտարարեց, որ դատարանի կարգադրությունը չկատարելու, անհարգալից վերաբերմունքի համար ամբաստանյալ Եղնուկյանի նկատմամբ կիրառում է դատական սանկցիա՝ 10 ժամով հեռացում նիստերի դահլիճից: 

Փաստաբան Տ. Հայրապետյանը նշեց, որ առարկում է նախագահող դատավորի ակնհայտ անօրինական գործողությունների շուրջ:

«Մանկապարտեզ եք  սարքել այստեղ: Դուք դատական սանկցիա  կարող եք կիրառել միայն օրենքով նախատեսված դեպքերում»,- ասաց նա:

Դատավորը նշեց, որ ձայնի իրավունք չի տալիս, ապա կիրառեց դատական սանկցիա՝ նախազգուշացում: Փաստաբանը շարունակեց իր առարկությունը: Ա. Գաբրիելյանը հայտարարեց, որ դատարանը գնում է խորհրդակցական սենյակ՝ փաստաբան Հայրապետյանի նկատմամբ դատական սանկցիա կիրառելու մասին որոշում կայացնելու:

«Ես եմ հեռանում, դուս սպասեք, ես հիմա հեռանալու եմ: Մանկապարտեզ եք սարքել, դուք դատավոր չեք ընդհանրապես»,-  գոռում էր փաստաբանը, երբ արդեն դատավորը դուրս էր գալիս նիստերից դահլիճից