Ձեր վստահելի աղբյուրը

Երևանի Ավան և Նոր Նորք վարչական շրջանների ընդհանուր իրավասության դատարանն  այսօր շարունակում է ՊՊԾ գնդի գրավման գործով 18 անդամի՝ Տիգրան  Սարգսյանի,  Հովհաննես  Վարդանյանի, Արամ  Հակոբյանի, Վարդան  Գերավետյանի, Սերգեյ Կյուրեղյանի, Գևորկ  Իրիցյանի, Տիգրան Մանուկյանի, Թորոս  Թորոսյանի, Արթուր  Մելքոնյանի, Արթուր  Սողոմոնյանի, Գառնիկ  Հովակիմյանի, Արայիկ  Հակոբյանի, Մարտիրոս  Հակոբյանի, Արամ  Մանուկյանի, Թաթուլ  Թամրազյանին, Հովհաննես  Հարությունյանի, Մանվել  Աթոյանի, Վարդգես  Գևորգյանի դատավարությունը: Նիստում ամբաստանյալ Թորոս Թորոսյանի պաշտպան Լիպարիտ Սիմոնյանը բարձրացրեց դատավոր Արտուշ Գաբրիելյանի բացարկի  հարցը:

Դատավոր Արտուշ Գաբրիելյանը հեռացավ խորհրդակցական սենյակ քննարկելու իր բացարկի հարցը: Դատական նիստն ընդմիջվել է:

«Միջնորդությունը պայմանավորած էր այն հանգամանքով, որ մինչև օրս տեղի ունեցած դատական նիստերի ժամանակ դատավորը ցուցաբերել է ակնհայտ շահագրգռվածություն ի վնաս պաշտպանական կողմի»,- «Ազատություն» ռադիոկայանի հետ զրույցում ասաց փաստաբանը:

Նա նշեց, որ Քրեական դատավարության օրենսգրքի համաձայն,  պաշտպանի չներկայանալու  և նրան այլ պաշտպանով փոխարինելու անհնարինության դեպքում դատական նիստն ուղղակի հետաձգվում է:

«Նման դեպքեր ունենք ցանկացած դատական նիստի ժամանակ, երբ պաշտպաններից որևէ մեկը չի ներկայացել: Այս, նաև նախորդ դատական նիստներին պաշտպաններից բավականին մեծ մասը ներկա չէին, դատարանը ուղղակի պետք է հետաձգեր դատական նիստը»,- ասաց փաստաբանը:

Լ. Սիմոնյանը նաև նշեց, որ դատարանի դահլիճում չի գտնվում որևէ տուժող:

«Ես ներքին համոզմունք հայտնեցի, որ գուցե նաև ծանուցված էլ չեն: Չի կարող լինել, որ 100-ից ավելի տուժածներ ծանուցվեն,  նրանցից որևէ մեկը դատական նիստին չգա: Դրանից ելնելով կարծում եմ, որ նրանք չեն ծանուցվել»,- ասաց փաստաբանը:

Երրորդ խնդիրը, Լ. Սիմոնյանի խոսքով, կապված էր դատական նիստից հեռացվելու պարագայում դատավարական ժամ հասկացողությունը կիրառելու հետ: