Ձեր վստահելի աղբյուրը

Ամերիկյան կաբելային HBO հեռուստաալիքը կներկայացնի նոր հեռուստասերիալ Չեռնոբիլի ատոմակայանի վթարի մասին: Այս մասին գրում է ՌԻԱ Նովոստին՝ հղում անելով «Ասոշիեյթեդ պրես»–ին:

HBO հեռուստաալիքը, որին պատկանում են այնպիսի սերիալներ, ինչպիսիք են «Գահերի խաղ», «Սեքս մեծ քաղաքում», նկարահանելու է հինգ մասանոց ֆիլմ աղետի մասին, որի գլխավոր դերում հանդես կգա Ջարեդ Հարիսը: Դերասանը հանդես կգա գիտնականի դերում, որին Կրեմլն ուղարկել է հետաքննել ատոմակայանի վթարի պատճառները:

Հեռուստասերիալի նկարահանումները նախատեսվում են սկսել 2018 թվականի գարնանը Լիտվայում:

1986 թվականի ապրիլի 26-ին Ուկրաինայի Չեռնոբիլ քաղաքում տեղի է  ունեցել  ատոմակայանի չորրորդ էներգաբլոկի վթար։ Տեղի ունեցած ռեակտորի պայթյունի հետևանքով  շրջակա տարածքները ենթարկել են ռադիոակտիվ ճառագայթման։ Չեռնոբիլի ատոմակայանի վթարը համարվում է խոշորագույնը ատոմային վթարների մեջ։

Չնայած, որ ատոմակայանը կոչվում էր չեռնոբիլյան, բայց այն տեղակայված էր համանուն գետի անունը կրող Պրիպյատ քաղաքի մոտ, որը հիմնականում էներգետիկներով էր բնակեցված:

Ատոմակայանի վթարի հետևանքով առաջին երեք ամսվա ընթացքում մահացել են 31 մարդ, 131 մարդ ստացել են տարբեր աստիճանների ճառագայթային հիվանդություն: Չեռնոբիլ քաղաքից ավելի քան 115 հազար մարդ տարհանվել է, ճառագայթման է ենթարկվել Ուկրանիայի, Ռուսաստանի Դաշնության և Բելառուսի տարածքների մի մասը: Չերնոբիլի ռադիացիան հայտնաբերվել է անգամ սկանդինավյան երկրներում: