Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում այսօր շարունակվեց Ժիրայր Սեֆիլյանի, Գևորգ Սաֆարյանի և մյուսների գործով դատական նիստը:

Նախագահող դատավոր Տաթևիկ Գրիգորյանը հայտատարեց, որ փաստաբաններից Արա Զաքարյանը տեղեկացրել է, որ այսօր Լոռի մարզի ընդհանուր իրավասության դատարանում պետք է մասնակցի նիստին, խնդրել է այս նիստը նշանակել այլ օր:

Դատավորը նաև տեղեկացրեց, որ դատարանին է ներկայացվել զննության վերաբերյալ արձանագրություն, որի համաձայն փաստաբան Նինա Կարապետյանցը դատական կարգադրիչի օրինական պահանջը չի կատարել: Տ. Գրիգորյանն ասաց, որ դատարանը ստացել է նաև Նինա Կարապետյանցի կողմից առարկություն,  ըստ որի՝ «անցել եմ զննություն, որը վերածվել է խուզարկության, հրաժարվել եմ ենթարկվել խուզարկության, ինչի արդյունքում թույլ չեն տվել մտնել դատական նիստերի դահլիճ՝ իրականացնելու իմ մասնագիտական պարտականությունները»:

Դատավորը հայտարարեց, որ նախապես տեղեկացրել են, որ ամեն ուրբաթ օր այս գործով նշանակված է դատական նիստ, պաշտպաններին առաջարկվել է ուրբաթ օրերին աշխատանքային ծանրաբեռնվածություն ունենալու պարագայում տեղեկացնել համապատասխան դատարաններին:  

«Դատարանն ընդգծում է, որ ամբաստանյալներին տրված է լիարժեք և իրական հնարավորություն իրենց կողմից ընտրված պաշտպանների միջոցով իրենց պաշտպանության իրավունքն իրացնելու համար: Սակայն ամբաստանյալների մի մասի կողմից  ընտրված պաշտպանների կողմից դրսևորվում են այնպիսի գործողություններ, որոնք ուղղված են  բացառապես դատական նիստերը խափանելուն: 

Դատարանը հորդորում է պաշտպաններին կատարել այնպիսի գործողություններ, որոնք ուղղված կլինեն ոչ թե դատական նիստերը խափանելուն, այլ ուղղված կլինեն իրենց վստահորդների արդյունավետ պաշտպանությունն իրականացնելուն»,- ասաց Տաթևիկ Գրիգորյանը:

Դատավոր նաև նշեց, որ դատական նիստերին չմասնակցելու պարագայում փաստաբանների  գործողությունները հանգեցնելու են Քրեական դատավարության օրենսգրքի 304-րդ հոդվածի 2-րդ մասի տիրույթում գնահատելուն, համապատասխան  իրավական մեխանիզմների գործադրմամբ՝ դատարանի կողմից համապատասխան հանրային պաշտպան նշանակելու մասին որոշման կայացմանը:

«Մինչդեռ դատարանի կողմից ձեռնարվում են բոլոր հնարավոր միջոցներն ամբաստանյալների կողմից ընտրված պաշտպանների մասնակցությունը դատական նիստում ապահովելու համար»,- հայտարարեց նախագահող դատավորը:

Նա նաև ասաց, որ նկատի ունենալով, որ փաստաբան Նինա Կարապետյանցն, ըստ էության,  հրաժարվել է զննության ենթարկվել ու ներկայանալ նիստին, դատարանը հեռանում է խորհրդակցական սենյակ՝ փաստաբանի վարքագծի վերաբերյալ համապատասխան որոշում կայացնելու:

Խորհրդակցական սենյակից վերադառնելուց հետո դատավորն ասաց, որ փաստաբանի նկատմամբ կիրառվում է դատական սանկցիա:

Դատական նիստը հետաձգեց: Հաջորդ նիստը կկայանա օգոստոսի 4-ին: