Ձեր վստահելի աղբյուրը

Թուրքիայում ոստիկանությունը շարունակում է գյուլենական համայնքի հետ կապ ունենալու կասկածանքով մարդկանց բերման ենթարկել։ Իսլամի հայտնի քարոզիչ, ամերիկաբնակ թուրք միլիարդատեր Ֆեթուլլահ Գյուլենի հիմնած կառույցի դեմ հետաքննության շրջանականերում Թուրքիայի 3 նահանգում 52 մարդ է բերման ենթարկվել։ Այս մասին կարդում ենք Էրմենիհաբերում։

Ըստ «CNN Türk» լրատվամիջոցի՝ Բիթլիս նահանգում բերման է ենթարկվել 13 մարդ, Վանում՝ 10, իսկ Մերսինում՝ 29 հոգի:

Մերսինում բերման ենթարկվածներից 25-ի նկատմամբ կալանավորման որոշում է կայացվել, իսկ մյուս 4-ն ազատ են արձակվել: Բիթլիսում  13 բերման ենթարկվածներից 10-ը կալանավորվել է։ Մյուս 3 բերման ենթարկվածների նկատմամբ հետաքննությունը շարունակվում է: Վանում բերման ենթարկվածների նկատմամբ դեռ կալանավորման որոշում չի կայացվել:
Բոլոր բերման ենթարկվածները   մեղադրվում են «Bylock» արգելված բջջային հավելվածից օգտվելու մեջ:

«Bylock» հավելվածն օգտատերերին հնարավորություն է տալիս հաղորդակցվել ծածկագրերի միջոցով: Ըստ թուրքական լրատվամիջոցների՝ այս հավելվածն օգտագործում են գյուլենականները՝ միմյանց հետ գաղտնի հաղորդակցվելու համար:
Նշենք, որ Թուրքիայի իշխանությունները Գյուլենի հիմնած գյուլենական շարժումն ահաբեկչական են համարում, իսկ հիմնադիր Գյուլենին մեղադրում են Թուրքիայում 2016թ հուլիսի 15-ի ռազմական հեղաշրջման փորձը կազմակերպելու մեջ: