Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվող ՊՊԾ գնդի 14 անդամների գործով դատական նիստին փաստաբան Արա Զաքարյանը ներկայացրեց  նախագահող դատավոր Արտուշ Գաբրիելյանին բացարկ ներկայացնելու միջնորդություն:

Նախքան միջնորդության ներկայացումը, դատավորը կարդած Քրեական դատավարության 90-րդ հոդվածը՝ «Դատավորի ինքնաբացարկը»:

Փաստաբան Ա. Զաքարյանն ասաց, որ այլ գործերով դատավարության ժամանակ դատավոր Գաբրիելյանը ցուցաբերել է դատավորին հարիր զսպավածություն, հանդուրժողականություն, չի զայրացել, անհեթեթ արտահայտություններ չի արել: Փաստաբանի խոսքով, ի տարբերություն մյուս գործերի, այս գործով դատավարության ժամանակ դատավորն ակնհայտորեն ի վիճակի չէ ցուցաբերել զսպվածություն, հանդուրժողականություն, անհարկի զայրանում է, հոգեպես անհավասարակշռված վիճակում գտնվելով՝ լեզվի սայթաքումներ է ունենում:

«Սակայն ոչ մեկս երաշխիք չունենք, որ դատավարության ընթացքում նման հոգեկան վիճակում  պարբերաբար չեք հայտնվի, իսկ հայտնվելու դեպքում այն բացասաբար չի անդրադառնա ձեր կողմից կայացված որոշումների վրա:  Դժվար է պատկերացնել, թե ինչ կարող է տեղի ունենալ, եթե հերթական անգամ զայրանաք, չկարողանաք  կառավարել ձեր  զգացմունքները, հանկարծ որոշում կայացնեք խափանման միջոց կիրառել փաստաբաններից որևէ մեկի նկատմամբ: Նման պայմաններում թե արդարադատության շահերից ելնելով, թե դատարանի հեղինակությունը և դատարանի հանդեպ հասարակության վստահությունը չվտանգելու անհրաժեշտությունից ելնելով՝ ճիշտ կլինի չլսեք այս քրեական գործը:

Նման հոգեվիճակ, ըստ գրականության, մասնագետների, առաջանում է  նրանից, երբ անձի  ներքին համոզմունքի և դրսևորվող վարքագծի միջև առկա է հակասություն, ինչն առաջացնում է ներքին լարվածություն:

Իմ ասածը հետևյալն է, որ այն համակրանքը, որ ներքուստ ունեք մեր պաշտպանյալների հանդեպ, նաև սրանով է երևում, որ դուք տարբերկված մոտեցումներ եք ցուցաբերում: Դա մարդկային է, բնական է, եթե մարդը մեկին համակրում է, նրա հանդեպ այլ ձև է վարվում:

Նշված հանգամանքները հաշվի առնելով՝ կոչ եմ անում ձեզ ինքնաբացարկի վերաբերյալ որոշում կայացրեք, մի թույլ տվեք, որպեսզի դատարանի հեղինակությունը, դատարանի հանդեպ հարգանքն էապես նվազի այս դատավարության շնորհիվ»,- ասաց Արա Զաքարյանը:

Մյուս ամբաստանյալների փաստաբանները միացան այս միջնորդությանը:

Մեղադրող դատախազը հայտարարեց, որ ինքնաբացարկի միջնորդությունը չի բխում Քրեական դատավարության 90-րդ հոդվածից, Եվրոպական կոնվենցիայից, որևէ հիմք, փաստարկ, հիմնավորում ներկայացված չէ, խնդրեց այն չբավարարել:

Դատավոր Ա. Գաբրիելյանը հայտարարեց, որ դատարանը գնում է խորհրդակցական սենյակ: