Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվում է ՊՊԾ գնդի 14 անդամների՝  Աշոտ Պետրոսյան, Արայիկ Խանդոյան, Արեգ Կյուրեղյան, Արմեն Բիլյան, Արմեն Լամբարյան, Գագիկ Եղիազարյան, Էդվարդ Գրիգորյան, Մխիթար Ավետիսյան, Պավել Մանուկյան, Սեդրակ Նազարյան, Սմբատ Բարսեղյան, Վարուժան Ավետիսյան, Կարո Եղնուկյան, Խաչատուր Գիչյան, գործով դատական նիստը:

Նիստին ներկա չէին ամբաստանյալներից մի քանիսի փաստաբանները՝ արձակուրդում լինելու պատճառով: Նախագահող դատավոր Արտուշ Գաբրիելյանն ասաց, որ նիստին ներկա չէ նաև Սմբատ Բարսեղյանի փաստաբան Հայկ Ալումյանը, ով դիմում է ներկայացրել դատարան, նշել, որ  ծանրաբեռնվածության պատճառով չի կարող ներկայանալ նիստին:

«Հայկ Ալումյանը 7 դատական նիստից ներկա է եղել ընդամենը մեկին: Անձը ծանրաբեռնված է: Նախորդ դատական նիստին օրենքով սահմանված կարգով, որոշում կայացվեց հրավիրել հանրային պաշտպան»,- հայտարարեց դատավորը:

Դատական նիստերի դահլիճ հրավիրվեց Սմբատ Բարսեղյանը, ում նկատմամբ դատական սանկցիա է կիրառված և նա նիստերին չի մասնակցում:

«Այլ պաշտպան ունենալու ցանկություն չունեմ»,- հայտարարեց նա:

Դատավոր Ա.Գաբրիելյանն ասաց, որ որպես հանրային պաշտպան ներկայացել է Արմիեն Ֆանյանը: Ամբաստանյալ Ս. Բարսեղյանն ասաց. «Իմ շահերը պաշտպանում է միայն ու միայն Հայկ Ալումյանը: Համաձայն չեմ հանրային պաշտպանի»: 

Այնուհանդերձ դատավորն ասաց, որ Քրեական դատավարության օրենսգրքի 69-րդ հոդվածի կարգով Ֆանյանը ներգրավվում է Բարսեղյանի շահերի պաշտպան:

«Տեխնիկապես, իրավաբանորեն չեմ կարող լինել այդ անձի պաշտպանը: Հայտարարում եմ, որ դատարանում Սմբատ Բարսեղյանի շահերը չեմ կարող ներկայացնելու՝ անկախ նրանից, որ դատարանը ներգրավվել է որպես պաշտպան»,- ասաց Ա.Ֆանյանը:

«Դատարանը ձեզ ներգրավել է գործով որպես պաշտպան, կարող եք օգտվել այդ հանգամանքից, տեսակցեք ձեր պաշտպանյալին,  միգուցե նորմալ, մարտավարական գործողություններ կարող եք ձեռնարկել»,- ասաց դատավորը՝ դիմելով հանրային պաշտպանին: