Ձեր վստահելի աղբյուրը

Կառավարության նիստում ընդունվել է հակածխախոտային պայքարի կոնցեպտը, որը նախատեսում է 4-5 ուղղություն: Կառավարության նիստից հետո լրագրողների հետ զրույցում ասաց առողջապահության նախարար Լևոն Ալթունյանը:

Նշենք, որ  գործադիրն այսօր հավանության արժանացրեց ծխելու դեմ պայքարի ռազմավարությանը և այդ ռազմավարության 2017-2020 թվականների միջոցառումների ծրագիրը:

Պատասխանելով հարցին, թե պատասխանատվության ինչպիսի՞ միջոցներ են նախատեսվում, տուգանքներ լինելու են, նախարարն ասաց. «Կոնցեպտը չի նախատեսում այդ հարցերի պատասխանները: Այդ հարցերի պատասխանները կլսեք կոնցեպտի ներքո մշակված օրենսդրական բարեփոխումներում: Դա կլինի նոյեմբեր-դեկտեմբեր ամիսներին»:

Խոսելով հասարակական վայրերում ծխելու սահմանափակումների մասին, Լ. Ալթունյանն ասաց, որ դրանք վերաբերում են երկրորդային ծխի ազդեցության հարցերին, որպեսզի զերծ պահեն չծխող բնակչությանը երկրորդային ծխի ազդեցությունից, խստացվելու է հասարակական վայրերում ծխելու թույլտվության հարցը:

«Հիմնականը, ինչը նշում է կոնցեպտը, և որը առաջ չկար մեր օրենսդրական  դաշտում, վերահսկող կազմակերպության, նրա իրավասությունների, պատասխանատվության շրջանակների  հստակեցումն է»,- ընդգծեց առողջապահության նախարարը:

Հարցին, թե շարունակո՞ւմ եք կարծել, որ ծխողներն անհաջողակներ են, նա ասաց. «Ես կարծում եմ, որ երիտասարդ սերունդը մեծացնելիս պետք է իրենց մոտ ձևավորել այդպիսի կարծիք»:

Նախարարի կարծիքով, ռազմավարության իրագործման դեպքում 2020 թվականին նախատեսվում է ծխողների ընդհանուր թվի 3-5 տոկոս կրճատում: