Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվում է ՊՊԾ գնդի գրավմանը մասնակցած խմբից 18 անդամների՝  Տիգրան  Սարգսյանի,  Հովհաննես  Վարդանյանի, Արամ  Հակոբյանի, Վարդան  Գերավետյանի, Սերգեյ Կյուրեղյանի, Գևորգ  Իրիցյանի, Տիգրան Մանուկյանի, Թորոս  Թորոսյանի, Արթուր  Մելքոնյանի, Արթուր  Սողոմոնյանի, Գառնիկ  Հովակիմյանի, Արայիկ  Հակոբյանի, Մարտիրոս  Հակոբյանի, Արամ  Մանուկյանի, Թաթուլ  Թամրազյանին, Հովհաննես  Հարությունյանի, Մանվել  Աթոյանի, Վարդգես  Գևորգյանի գործով դատավարությունը:

Ամբաստանյալների շահերի պաշտպանները հանդես եկան միջնորդությամբ՝ վերացնել իրենց  պաշտպանյալի նկատմամբ կիրառված  սանկցիան՝ «դատական նիստերի դահլիճից անորոշ, անհասականալի ժամանակով հեռացնելու վերաբերյալ», որպեսզի նրանք ներկայանան դատական նիստերի դահլիճ, քանի որ նրանց բացակայությամբ չեն կարող իրականացնել իրենց պարտականությունները:

Նախագահող դատավոր Արտուշ Գաբրիելյանը մերժեց այդ միջնորդությունը:

Դահլիճում ներկա  ամբաստանյալ Արամ Մանուկյանը հայտարարեց, որ հրաժարավում է մասնակցել նիստին: Արամ Մանուկյանը հեռացավ դահլիճից: Նրա նկատմամբ կիրառվեց դատական սանկցիա՝ հեռացում նիստերի դահլիճից տասը ժամով:

Ամբաստանյալ Հովհաննես Հարությունյանը հայտարարեց, որ  ինքը միջնորդություն ունի ներկայացնելու:

«Եթե միջնորդություն ունեք՝ կանգնեք…հետևաբար ձեր նկատմամբ էլ եմ կիրառում դատական սանկցիա՝ նախազգուշացում»,- ասաց դատավորը:

Այնուհետև Հ. Հարությունյանն ասաց, որ ինքն էլ է հեռանում նիստերի դահլիճից:  Դատավոր Ա.Գաբերիելյանը հայտարարեց, որ ամբաստանյալի նկատմամբ նույնպես կիրառվում է դատական սանկցիա՝ 10 ժամով հեռացում նիստերի դահլիճից:

Հ. Հարությունյանի  պաշտպան Հայարփի Սարգսայանն ասաց. «Իմ պաշտպանյալը ինքնաբացարկի միջնորդություն ունի ներկայացնելու, դուք իրավունք չունեք իմ պաշտպանյալին տանելու»:

Ոստիկանները բռնեցին Հ. Հարությունյանի ձեռքից, դուրս էին տանում, երբ դռան մոտ ամբաստանյալը ձեռնափայտով հարվածեց գետնին: Դրանից հետո ոստիկաններն արդեն հրելով նրան դուրս տարան: