Ձեր վստահելի աղբյուրը

«Իրավաբանական ուժի տեսակետից այս հայտարարությունը չի կարող սահմանափակել ոչ Դատական դեպարտամենտի իրավասությունները, ոչ Փաստաբանների պալատի, առավել ևս՝ փաստաբանների անկախությունը»,-   «Ազատություն» ռադիոկայանի եթերում ասաց Փաստաբանների պալատի նախագահ Արա Զոհրաբյանը՝ խոսելով ՀՀ փաստաբանների պալատի և ՀՀ դատական դեպարտամենտի համատեղ հայտարարության մասին՝ դատական կարգադրիչների կողմից փաստաբաններին զննության ենթարկելու հետ կապված հարցի վերաբերյալ:

Ա. Զոհրաբյանի խոսքով, սա պայմանավորվածություն է, ջենտլմենական պայմանավորվածություն է ստեղծված իրավիճակում, երբ որ կան տարաձայնություններ, երբ որոշակի հարցերի վերաբերյալ ՓՊ-ն իր փաստարկներն է պնդում, Դատական դեպարատամենը՝ իր փաստարկները:

«Գոնե  առնվազն այս իրավիճակում այս եղանակով կազմակերպվի  զննությունը, որպեսզի մեր փաստաբաններին առավել անհարմարություններ չպատճառվի»,- նշեց նա՝ հավելելով, որ երբ փաստաբանը բացում է պայուսակը ու բոլորի ներկայությամբ դատարկում պայուսակի պարունակությունը, հասարակության աչքի առաջ անելը պատիվ չի բերում  փաստաբանին, կարծես թե տպավարություն է ստեղծվում, որ փաստաբանն ինքն է անպաշտպան:

Ա. Զոհրաբյանի խոսքով, ՓՊ-ում կարծում են, որ պետք է օրենքով արգելված իրերի ցանկ լինի, մինչդեռ Դատական դեպարտամենտում կարծում են, որ նման ցանկ հատուկ օրենքով չպետք է լինի, ցակացած դեպքում իրենք կարող են որոշել՝ արգելված իր է, թե ոչ:

«Տարընկալումներ կան, որոնք ինչ-որ կերպ պետք է լուծվեն: Մինչև  դրա  լուծմանը հասնենք, բնականաբար,  կարևոր է, որ այս իրավիճակում ինչ-որ մի կերպ այդ հարցը կարգավորենք, որովհետև բաց թողելն էլ ի վերջո կբերի խնդիրների»,- ասաց Փաստաբանների պալատի նախագահը:

Նա նաև նշեց, որ նախնական մյուս տարվա մեջ Դատական դեպարտամենտը ձեռք կբերի սկաներ սարքերը՝ պայուսակը կդնեն, կանցնի: