Ձեր վստահելի աղբյուրը

Ապրիլյան պատերազմի հերոս Ազատ Սիմոնյանի մայրը երեկ Սուրբ Գրիգոր Լուսավորիչ ԲԿ-ում արու զավակ է լույս աշխարհ բերել: Մոր և երեխայի վիճակը լավ է, Արթուրը ծնվել է   3 կգ 570 գ քաշով, 50 սմ հասակով:

«Ոնց որ չհավատամ, ի՞նչ ասեմ»,-Panorama.am-ի հետ զրույցում ասաց ընտանիքի հայրը՝ Քաջիկ Սիմոնյանը:

Ազատ Սիմոնյանը   Կոտայքի մարզի Կամարիս գյուղից է: Ազատը ապրիլյան քառօրյա պատերազմի առաջին օրվանից անհայտ կորածների ցուցակում էր, միայն ապրիլի 10-ին՝  զոհվածների մարմինների փոխանակման ժամանակ պարզվեց, որ հայկական կողմին  հանձնված 18 զոհերից մեկն էլ Ազատն է:

Ազատը Զինված ուժեր զորակոչվել էր 2015 թվականին՝ ծառայության անցնելով Ջաբրաիլում:

Ազատի ֆեյսբուքյան գրառումներից մեկում գրված էր. «Կարոտ հոգիս տխուր է, սիրտս` ալեկոծ, կյանքս կանգնել է, առաջ չի գնում, կարոտն է խեղդում կոկորդիս կանգնած, աչքերս տխուր տունս են փնտրում, մի փնտրեք աչքեր, զուր են ձեր ջանքեր տունս չեք գտնի՝ այն շատ հեռու է, այնտեղ՝ տանս մեջ, որդու կարոտից մայրս է լալիս, մի լացիր մայրիկ մի օր տուն կգամ, երդվում եմ մայրիկ՝ մի օր տուն կգամ, ամեն կաթիլ արցունքիդ համար պատասխան կտամ»:







Լուսանկարները՝ ֆեյսբուքից: