Ձեր վստահելի աղբյուրը

Սեպտեմբերի 1-ից ուժի մեջ է մտնում «Հանրակրթության մասին» օրենքի այն պահանջը, որի համաձայն՝ հանրապետությունում 12-ամյա կրթությունը դառնում է պարտադիր: Այսօր լրագրողների հետ հանդիպմանն ասաց ՀՀ ԿԳՆ հանրակրթության վարչության պետ Աշոտ Արշակյանը՝ հիշեցնելով, որ մինչ այս պարտադիր էր 9-ամյա կրթությունը:

Նրա խոսքով, 12-ամյա պարտադիր կրթությունը աշխարհում կայուն զարգացման նպատակներից մեկն է, որը Հայաստանում ոչ միայն օրենքի, այլև սահմանադրական պահանջ է:

«Կան երեխաներ, ովքեր ավարտելով 9-ամյա դպրոցը, չեն շարունակում կրթությունը, իսկ սեպտեմբերի 1-ից պետք է պարտադիր հաճախեն կամ ավագ դպրոց, կամ արհեստագործական ուսումնական հաստատություն, կամ էլ միջին մասնագիտական ուսհաստատություն»,-նշեց Արշակյանը:

Նա ընդգծեց, որ դպրոցն ավարտելուց հետո խնդիր կա այդ երեխայի բազան ունենալու, ճշգրտելու և կրթությունը կազմակերպելու հետ կապված. «Օրենքի պահանջ է, որ 2025թ-ը անցնելու ենք համընդհանուր ներառական կրթության կազմակերպման և կարիք կա կրթության առաձնահատուկ պայմանների կրթության իրավունքի իրացման հետ: Որոշ դեպքերում ծնողների չգիտակցելու կամ խնդրին լուրջ չվերաբերվելու դեպքում շատ երեխաներ կարող են դուրս մնալ կրթությունից: Դուրս մնացածների թվում հիմնականում այն երեխաներն են, որոնց վեց տարին լրանալուց ծնողը մտածում է փոքր է ու չի ուղարկում»:

Հանրակրթության վարչության պետը հայտնեց, որ այս ուսումնական տարվանից Լոռու մարզում փորձնական մեկնարկելու է մի ծրագիր, որով կրթությունից դուրս մնացած երեխաները վաղ կհայտնաբերվեն և դպրոց կուղարկեն. «Փորձնական համակարգը Լոռու մարզում է և ամփոփումից հետո 2018-ին ամբողջ հանրապետության տարածքում արդեն կներդրվի»:

Հանդիպմանը ներկա ՄԱԿ-ի մանկական հիմնադրամի կրթական ծրագրերի ղեկավար Ալվարդ Պողոսյանն ասաց, որ կրթությունից դուրս մնացած երեխաների խնդիրը միայն ԿԳՆ-ի խնդիրը չէ.
«Վիճակագրական տվյալներով կրթությունից դուրս է մնում տարեկան մոտ 300 երեխա, որը մեկ տոկոսից էլ քիչ է: Այսինքն՝ շուրջ 300 երեխա չի շարունակել տվյալ ուսումնական տարում կրթությունը, անավարտ են թողել և գուցե սեպտեմբերին կգան: Դա այն երեխաներն են, որոնք մեկ անգամ եղել են դպրոցում ու տարվա կեսից դուրս են մնացել: Դրանք հիմնականում սոցիալական ծանր պայմաներում ապրող ընտանիքներ են»:

Կրթական տեխնոլոգիաների ազգային կենտրոնի տնօրեն Արտակ Պողոսյանի տեղեկացմամբ՝ 9-ամյա կրթությունից հետո չշարունակողների թիվը չնչին է:

«2016 թվականի հետազոտությունը ցույց է տվել, որ 9-րդ դասարանից հետո մոտ 98 տոկոսը շարունակում է կրթությունը: Իսկ այն հայտարարությունները, թե 10 տոկոսը չեն շարունակում, սա վերաբերում է ավագ դպրոցներին, այսինքն ավագ դպրոց չեն գնում, բայց գնում են նախնական կամ միջին մասնագիտական կրթության ուսհաստատություններ»,- ասաց Արտակ Պողոսյանը:

Ինչ վերաբերում է կրթությունից դուրս մնացած երեխաների հայտնաբերման համակարգին, ԿՏԱԿ-ի տնօրենն ընդգծեց, որ դրանով հնարավորություն կունենան հետևել և հասկանալ թե երեխան ինչու չի շարունակում հաճախել դպրոց:

«Սեպտեմբերի 10-ից, երբ դպրոցներում հստակեցվի աշակերտների թիվը, ավտոմատ համակարգը ցույց կտա, թե 2011-ին ծնված, բազայում գրանցված երեխաներից դպրոցում ով ներգրավված չէ և կպարզեն՝ այդ երեխաները հանրապետությունում են, թե ոչ, և որոնք են դպրոց չհաճախելու պատճառները: Մեկ այլ հատվածում էլ կգրանցվեն այն երեխաները, որոնք տարվա կեսից անավարտ են թողնում կրթությունը կամ հաճախակի բացակայում: Ամենօրյա ռեժիմով կարող ենք տեսնել ինչ վիճակում է տվյալ երեխան: Խնդիրը հայտնաբերելուց հետո համապատասխան մարմիներին կտեղեկացվի և լուծումներ կգտնվի»,- հավելեց նա: