Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում այսօր շարունակվող Ժիրայր Սեֆիլյանի գործով դատավարության մեկնարկին նախագահող դատավոր Տաթևիկ Գրիգորյանը  դահլիճ հրավիրված Ժիրայր Սեֆիլյանին և տեղեկացրեց, որ հանրային պաշտպան Էմին Բեգլարյանն է ներկայացել: Դատարանը հետաքրքրվեց, արդյոք ունի՞ առարկություն  Սեֆիլյանը:

Մինչ պատասխանելը Սեֆիլյանը կոչ արեց Վարդան Գերավետյանը, Տիգրան Մանուկյանը և Վարդգես Գևորգյանը դադարեցնեն հայտարարած հացադուլը:

«Դուք մեզ ողջ-առողջ  եք պետք, ժողովուրդը ձեզ սպասում է, և թող չկասկածեն, որ առաջիկայում միասին մեծ գործ ունենք անելու»,-ասաց Սեֆիլյանը:

Հիշեցնենք, նրանք հացադուլը դադարեցրել էին երեկ երեկոյան:

Անդրադառնալով հանրային պաշտպանի վերաբերյալ հարցին, Սեֆիլյանն ասաց, նրան չի ճանաչում, հարգում է, սակայն  դատավարության ընթացքը, ըստ նրա, անհեթեթ է:

«Դուք իմ իրավունքը խախտում եք, ոչ թե իմ պաշտպանները բացակայում են, այլ ապօրինի խուզարկությունների պատճառով թույլ չեք տալիս, որ նրանք ներկա գտնվեն»,-ասաց նա:

Դատավորը հիշեցրեց, որ Սեֆիլյանը թույլ չի տալիս պաշտպաններին մասնակցել դատավարությանը՝ քանի դեռ ինքը հեռացված է դահլիճից: Դատավորն ասաց, որ ձեռնարկվում են բոլոր պատշաճ գործողությունները, փաստաբանները ստանում են պատշաճ ծանուցում դատական նիստերի մասին:

«Դուք  հանձնարարել եք, որ նրանք ձեր բացակայության ժամանակ չմասնակցեն նիստերին: Դատարանը Ձեզ պարզաբանել է, որ հեռացված լինելու ժամանակ պաշտպան պետք է ունենաք, պաշտպանի մասնակցությունը պարտադիր է, դատարանը պետք է Ձեզ ապահովի փաստաբանով»,-ասաց Տ. Գրիգորյանը:

Սեֆիլյանն ասաց, որ հրաժարվում է դատարանի կողմից ներկայացված հանրային պաշտպանից:

Ներսես Պողոսյանն էլ հայտարարեց, որ չի ցանկանում հանրային պաշտպան:

Դատավոր Տաթևիկ Գրիգորյանն ասաց, որ Էմին Բեգլարյանը ներգրավվում է որպես ամբաստանյալներ Ժիրայր Սեֆիլյանի ու Ներսես Պողոսյանի պաշտպան:

«Դատարանը չի ընդունում ամբաստանյալների կողմից պաշտպանի հրաժարումը, և Ձեզ  նշանակում է որպես վերջիններիս շահերի պաշտպան»,-ասաց դատավորը՝ դիմելով փաստաբանին:

Հանրային պաշտպանը միջնորդեց դատական նիստը հետաձգել, որպեսզի հնարավորություն ունենա ծանոթանալ գործի նյութերին: Դատարանը բավարարեց միջնորդությունը, հաջորդ նիստը տեղի կունենա օգոստոսի 18-ին ժամը 11-ին: