Ձեր վստահելի աղբյուրը

«Աստանայում տեղի ունեցած վարչապետերի վերջին հանդիպումը բավականին հուսադրող էր: Հանրության կողմից երկար սպասված ավտովարորդների վկայականների ճանաչման գործընթացը, կարծես, հանգուցալուծում ստացավ»,- այսօր լրագրողների հետ հանդիպմանն ասաց Հայրենական ապրանք արտադրողների միության նախագահ Վազգեն Սաֆարյանը:

Նաև հայտնեց՝ ընդունելով Աստանայի վերջին ու վերջերս Հայաստանում ԵԱՏՄ նախարարների հանդիպումները ցանկանում են, որ նոր ընթացք տրվի ԵԱՏՄ շրջանակներում արդյունաբերության՝ մասնավորպես մեքենաշինության ոլորտի զարգացմանը:

«Ռուսաստանի մեքենաշինարարների միությունը, Բելառուսի ու Ղազախստանի համանման կառույցները ստեղծել են կոորդինացիոն խորհուրդ, որը գործում է ԵԱՏՄ շրջանակներում: Այս խորհրդի հերթական նիստը սեպտեմբերին որոշվել է անցկացնել Հայաստանում: Օրակարգը ձևակերպել ենք հետևյալ կերպ՝ մեքենաշինության ոլորտի զարգացման խնդիրներին առնչվող հարցեր՝ ԵԱՏՄ արդյունաբերական քաղաքականության համատեքստում»,- նշեց Սաֆարյանը:

Նրա խոսքով՝ այսօր մեր տնտեսական կապերը ոչ բավարար չափով են գործում և այս հանդիպումով փորձելու են ստեղծել հարթակ, որպեսզի կարողանանք համագործակցության եզրեր գցել ԵԱՏՄ երկրների հետ:

«Արդեն մեր հաստոցաշինական ձեռնարկությունների ղեկավարներին դիմել ենք նամակով, որպեսզի տան իրենց առաջարկությունները, կոնֆերանսն ավելի արդյունավետ կազմակերպելու համար»,- նշեց Հայրենական ապրանք արտադրողների միության նախագահը:

Վազգեն Սաֆարյանը բացատրեց, որ մեքենաշինության արդյունաբերություն ասելով պետք է հասկանալ թե հաստոցաշինություն, թե ավտոմեքենաշինություն: