Ձեր վստահելի աղբյուրը

«Առավոտ»-ը վերլուծականում անդրադարձել է սեպտեմբերին Երևանում կայանալիք  Հայաստան-Սփյուռք վեցերորդ համաժողովին  և համահայկական խորհրդի ստեղծմանը:

Թերթը, մասնավորապես, գրել է. «Պարզ է, որ Հայաստանի առջև Սփյուռքը չունի և չի կարող ունենալ միակողմանի պարտավորություններ։ Գլենդելում ապրող նոր սփյուռքահայը, ով առանձնապես չի էլ դարձել ամերիկացի, բայց նաև հայկական իրականության մեջ միայն ֆեյսբուքյան վիրտուալ ներկայություն ունի, հայաստանյան  լրահոսում իրեն պարփակել է միայն բացասական նորություններով, որպեսզի հոգեբանորեն արդարացնի արտագաղթը։ Երբ Հայաստանում ստեղծվի ժողովրդավար, ուժեղ ու կազմակերպված երկիր, մեր հայրենակիցները կլցվեն հպարտությամբ  և չեն վարանի հայրենիքի հետ իրենց ասոցացնելուց մտածել նաև պետության դիրքերից, ոչ միայն ընտանեկան կապերի մասին։ Իսրայելական սփյուռքի և  բազմաթիվ մարդկանց հայրենադարձության գաղտնիքը հենց այդտեղ է։ Այդտեղ է  նաև գործուն Համահայկական խորհուրդ ունենալու գաղտնիքը։

Հայաստանը օբյեկտիվորեն այժմ գտնվում է մեծ քաղաքական փոփոխությունների նախաշեմին։ Նոր Սահմանադրության պահանջներին համապատասխան ձևավորվելու է նոր քաղաքական համակարգ, որը մասնակցության նոր ձևեր և հնարավորություններ է ստեղծելու հասարակության համար։ Վերափոխման կարիք ունի նաև պետական բյուրոկրատական համակարգը, որը անխուսափելիորեն պետք է թարմացվի։

Այսպիսով` թվում է, որ ներկայումս ինքնըստինքյան ձևավորվել է մի քաղաքական միջավայր, երբ համազգային մարմնի ձևավորման աշխատանքները պատմական հնարավորություն ունեն պսակվելու հաջողությամբ։ Քաղաքագետների, մտավորականների, համայնքային գործիչների և երիտասարդ առաջնորդների խնդիրն է  այժմ, լցնել այդ գաղափարը բովանդակությամբ, քննադատությամբ և առանց պաթոսի գործնական առաջարկներով։

Հակառակ դեպքում՝ հայրենիքից նեղացած մարդիկ կրկին կգրավեն թե՛ լրահոսը, թե՛ մեր մտքերը։ Սա այն դեպքն է, որ հասարակական ներգրավվածությունը կարող է գաղափարը փրկել և ուղղորդել կառուցողական դաշտ»։