Ձեր վստահելի աղբյուրը

«Իրազեկ և պաշտպանված սպառող» ՀԿ նախագահ Բաբկեն Պիպոյանը  նկատել է, որ ԳՆ Սննդի անվտանգության պետական ծառայությունը տարբերակված մոտեցում է ցուցաբերում խոշոր և մանր տնտեսվարողների գործունեության վերահսկողության արդյունքների  վերաբերյալ հաղորդագրություններ տարածելիս, իսկ սպառողների շահերի պաշտպանության սկզբունքը մղված է երկրորդ պլան:

Որպես օրինակ, նա մատնանշում է պաղպաղակի  ու գազավորված ոչ ալկոհոլային ըմպելիքների  շուկայում կատարած վերահսկողության արդյունքների մասին հրապարակումները:

«Մի դեպքում առկա ռիսկերի հաղորդակցումը կա, մեկ այլ դեպքում՝ ոչ: Միջին վիճակագրությամբ տեսանելի է դառնում, երբ գործ ունենք խոշոր բիզնեսի հետ, հիմնականում խուսափում են անուններ տալ, բայց երբ գործ են ունենում մանր բիզնեսի հետ, անուններ տալիս են»,-ասաց Պիպոյանը:

Հիշեցնենք, որ պաղպաղակի շուկայի վերահսկողության արդյունքները ծառայության հաղորդագրության մեջ շատ ընդհանուր էին ներկայացված, և այդպես էլ սպառողին անհայտ մնաց, թե որ արտադրողի որ տեսակի պաղպաղակի որ խմբաքանակում ինչ թերություններ են եղել:

Միայն նշվում էր, որ «լաբորատոր փորձաքննության արդյունքների հիման վրա կասեցվել են հինգ պաղպաղակ արտադրողների՝ «Թամարա և Անի» ՍՊԸ, «Ա. Ավետյանի Ա.Ս.Ա» ՍՊԸ, «Իգիթ» ՍՊԸ, «Ոսկե Պինգվին» ՍՊԸ, «Արմսվիթ» ՍՊԸ արտադրական գործընթացի առանձին գործառույթներ: Տնտեսավարող սուբյեկտների կողմից արտադրված պաղպաղակի խմբաքանակները օգտահանման կամ ոչնչացման նպատակով հետ են կանչվել շուկայից»:

Ինչ վերաբերում է գազավորված ըմպելիքներին, ապա հստակ անուններ էին նշված, ծառայությունն էլ սպառողներին կոչ էր անում չգնել այդ լիմոնադները:

«Պաղպաղակի շուկայի վերահսկողության արդյունքների մասին խոսելիս, ոչինչ չասվեց, թե այս պահին ռիսկեր կա՞ն, թե՞ ոչ: Սա այն պարագայում, երբ մամուլում հրապարակում էր եղել կեղծված պաղպաղակների առկայության մասին: Ըստ էության,  դա ոչ թե սպառողների շահերին ուղղված  կամ ռիսկերի հաղորդակցման նպատակ ունեցող հաղորդագրություն է, այլ PR քայլ:

Մինչդեռ ծառայության կանոնադրության համաձայն, սպառողների շահերի պաշտպանությունն ու թափանցիկության սկզբունքն են առաջնային»,-ասաց Պիպոյանը՝ կարծիք հայտնելով, որ այդ սկզբունքները չկան:

Նրա գնահատմամբ, ծառայության հաղորդագրություններն ավելի շատ հարցեր են առաջացնում, քան պատասխաններ տալիս, բացի այդ էլ վնասում են տնտեսվարողների շահերին:

«Մարդիկ մի քանի տնտեսվարողի անուն են կարդում, սակայն ոչինչ չեն հասկանում, թե դրանցից որն է վտանգավոր, որը պետք է ձեռք չբերեին: Այս պարագայում իրենք հրաժարվում են ընդհանրապես պաղպաղակ գնելուց, արդյունքում տուժում է և սպառողը, և արտադրողը»,-ասաց Պիպոյանը:

Խոսելով պատճառների մասին, նա կարծիք հայտնեց, «բացի մասնագիտական կոմպետենտությունը, առկա են նաև այլ շահեր՝ հովանավորություն, անհետևողականություն կամ էլ ոչ պատշաճ աշխատանք»: