Ձեր վստահելի աղբյուրը

Դատավար Արտուշ Գաբրիելյանը չբավարարեց ՊՊԾ գնդի գրավման գործով ամբաստանյալների պաշտպանների միջնորդությունը՝ դատարանին ինքնաբացարկ հայտնելու վերաբերյալ:

«Ոչ ժամանակին արված միջնորդություն է, հետագայում դուք կաշկանդված չեք այս միջնորդությունը նորից ներկայացնել: Ներկա պահին գտնվում ենք ամբաստանյալների ինքնությունը պարզելու, պաշտպաններին ներգրավելու և մնացած հարցերում, երբ դրանք կավարտենք միջնորդությունների փուլում, դուք կասեք»,-ասաց դատավորը, ավելացնելով, որ միջնորդությունը քննության առարկա չի կարող դառնալ:

Փաստաբան Ինեսա Պետրոսյանն ասաց առարկում է դատավորի որոշմանը, ասաց՝ սա կարևոր փուլ է, պաշտպանները գործում ներգրավում են անօրինական կերպով:

«Նրանք չեն ցանկանում, որպեսզի իրենց շահերը ներկայացնեն հանրային պաշտպանները, և այս միջնորդությունը տեղին է, դուք ամբողջությամբ անցել եք անօրինական գործողությունների, որը որդեգրել էիք ի սկզբանե: Հակառակ դեպքում մենք պաշտպաններով կարող ենք այլ միջոցների դիմել ձեր անօրինականությունների դեմ»,-ասաց նա:

Առարկություն հայտնեց նաև փաստաբան Լուսինե Սահակյանը, ասաց, Քրեական դատավարությունների մասին օրենսգիրքը չի նախատեսում միջնորդությունների փուլ:

Ինեսա Պետրոսյանը նշեց՝ չի հասկանում, ինչով է առաջնորդվում դատարանը, չգիտեն՝ ինչ սկզբունքով առաջնորդվեն փաստաբանները: Նա ընդմիջում խնդրեց, դատարանն էլ խնդրանքը բավարարեց՝ հայտարարելով 30 րոպե ընդմիջում: