Ձեր վստահելի աղբյուրը

ՊՊԾ գնդի գրավման գործով մեղադրյալներից Կարո Եղնուկյանի պաշտպան Տիգրան Հայրապետյանն այսօրվա նիստում բացարկի դիմում ներկայացրեց դատավոր Արտուշ Գաբրիելյանին:

Հայրապետյանն ասաց, Կարո Եղնուկյանին, ում նկատմամբ  դատարանը սանկցիա է կիրառել ու արգելել ներկա լինել դատական նիստերին, քրեակատարողական հիմնարկից ամեն անգամ բերում են դատարանի վարչական շենք: Փաստաբանը նշեց, որ դատավորի այդ ցուցումն անօրինական է:

Միջնորդությանը միացան մյուս մեղադրյալների պաշտպաններ Ինեսսա Պետրոսյանը, Լուսինե Սահակյանը, Արա Ղարագյոզյանը, դատարանում ներկա մեղադրյալները:

Իննեսա Պետրոսյանն էլ նշեց, որ իր պաշտպանյալ Պավել Մանուկյանն էլ առողջական խնդիրներ ունի:

«Ակնհայտ է, որ դուք ինքնաբացարկ պետք է հայտնեք: Պավել Մանուկյանի նկատմամբ էլ եք դուք իրականացրել խոշտանգում՝ բերելով դատարանի վարչական շենք, իմանալով նրա առողջական ծանր վիճակի մասին»,-ասաց փաստաբանը:

Պետրոսյանը կարծիք հայտնեց, որ դատավորը Կարո Եղնուկյանի նկատմամբ «առավել անմարդկային» վերաբերմունք է ցուցաբերել՝ սանկցիա կիրառելով ջուր խմելու ցանկության համար:

Դատավոր Արտուշ Գաբրիելյանն ասաց, համաձայն չէ այդ գնահատականին, պատրաստ է պաշտպանին տրամադրել որոշումն ու կրիչները:
«Ջուր խմելը հիմք չէ սանկցիա կիրառելու համար, դա ձեր սուբյեկտիվ կարծիքն է»,-ասաց դատավորը:

Պաշտպաններից Արա Ղարագյոզյանն էլ կարծիք հայտնեց, որ «գործից ընդհանրապես պետք է դատավորը հեռանա, քանի որ չի կարող օբյեկտիվ քննել»: Նա հիշեցրեց, որ նկուղում  է գտնվում Արմեն Ղազարյանը, ով «խոշտանգել է մեր պաշտպաններին՝ Արայիկ Խանդոյանին, Կարո Եղնուկյանին, նա ընդհանրապես վտանգավոր է, որ միայնակ մնա նրանց հետ»:

Մեղադրող կողմն առարկություն ներկայացրեց Տիգրան Հայրապետյանի միջնորդությանը՝ նշելով, որ միջնորդության մեջ հիմնավորումներ չկան:

«Օրենքով նշված որևէ հիմք չնշվեց»,-ասաց մեղադրող կողմն ու ավելացրեց, որ դատարանը կարող է ցանկացած պահի դատարանի դահլիճ հրավիրել մեղադրյալներին: Տուժողներն էլ միացան մեղադրողի առարկությանը:

Դատարանը հեռացավ խորհրդակցական սենյակ՝ որոշում կայացնելու: Դատավոր Արտուշ Գաբրիելյանն ասաց, որ որոշումը կհրապարակվի մեկ ժամ անց: