Ձեր վստահելի աղբյուրը

ԱԺ նախկին պատգամավոր, Մարդկային զարգացման միջազգային կենտրոնի ղեկավար Թևան Պողոսյանը Հայաստանի համար կարևորում է սեփական օրակարգ ունենալը:

ԼՂ խնդրի կարգավորման սկզբունքների վերաբերյալ ամերիկացի հեռացող համանախագահ Հոգլանդի  հայտարարությունների քննարկումը նա համարում հայկական իրականության մեջ քննարկումների նոր օրակարգի ներդրում:

«Այնպիսի տպավորություն է, որ խնդիր էր դրվել հայկական քննարկումների մեջ նոր օրակարգ բերել, մոռանալ մեր տնտեսական, ժողովրդավարական խնդիրները, անվտանգության հարցերը, քննարկենք հին թեզի նման  տարբեր բառախաղով ներկայացված մի երևույթ: Եթե Հոգլանդի նպատակը դա էր, ապա նա հասել է նպատակին»,-լրագրողների հետ այսօրվա հանդիպմանն ասաց Պողոսյանը:

Նրա խոսքով, եթե նպատակը եղել է հիշեցնել, որ ԱՄՆ-ն ևս ներգրավված է ԼՂ խնդրի կարգավորման բանակցություններում, ապա այս դեպքում էլ ամերիկացի դիվանագետը հաջողել է՝ հաշվի առնելով հանգամանքը, որ հայտարարությունն արվել է Սարգսյան-Պուտին հանդիպման օրը:

Նախկին պատգամավորը Հայաստանի համար առավել կարևորում է սեփական օրակարգ ունենալը.
«Մենք ընկել ենք և քննարկում ենք լիակատար այլ օրակարգեր՝ մոռանալով սեփական օրակարգի մասին: Ժամանակն է, որ մենք մեր սեփական օրակարգից չհեռանանք, չընկնենք այլոց շահերի սպասարկման մեջ»:

Ռիչարդ Հոգլանդի հայտարարությունից հետո Թևան Պողոսյանը մի դրական բան է նկատել՝  հայկական հասարակությունում տեղի են ունենում քննարկումներ, հայկական հասարակությունը բաց է տարբեր տեսակետներ հնչեցնելու համար, սա այն դեպքում երբ Ադրբեջանում փակում են «Թուրան» գործակալությունն ու լրագրողներ են ձերբակալում:

«Ես շատ ուրախ եմ, որ Արցախի ներկայացուցիչները շատ ավելի չոր, հստակ, կարճ հայտարարություններ են արել»,-ասաց նա:

Մանրամասները՝ տեսանյութում: