Ձեր վստահելի աղբյուրը

«Արմավիր» ՔԿՀ այցելած հանրային պաշտպան Մարինե Թովմասյանի հետ Ժիրայր Սեֆիլյանը հրաժարվել է հանդիպել: Այսօրվա դատական նիստում հանրային պաշտպանը հայտարերեց, որ Սեֆիլյանը հայտնել է, որ հրաժարվում է  հանդիպել ոչ թե նրա, այլ ցանկացած հանրային պաշտպանի հետ: Նա կատարվածի մասին արձանագրությունը փոխանցեց դատարանին:

«Որպես հանրային պաշտպան փորձում եմ իրականացնել իմ լիազորություններն օրենքի շրջանակում, սկսել եմ ծանոթանալ քրեական գործին, դեռ ամբողջությամբ չեմ ավարտել: Անկախ դրանից, գործին ծանոթանալն ինձ համար լինելու է ինչպես գեղարվեստական գրքի ընթերցում, որևէ դիրքորոշում չեմ կարողանալու դատարանին հայտնել»,-ասաց նա:

Մարինե Թովմասյանը հայտարարեց, որ չի կարող իրականացնել պաշտպանի վերապահված իրավունքներն ու պարտականություններն այս գործով չի կարող իրականացնել: Դատական դահլիճում գտնվողները հայտարարությունն ընդունեցին ծափահարություններով:

Սակայն դատավորը նշեց, որ դատարանի դիրքորոշումը չի փոխվում, Մ. Թովմասյանն ունի պաշտպանի դատավարական կարգավիճակ, պետք է օգտվի իրավունքներից բարեխղճորեն, պարտականությունները կատարի պատշաճ, իրականացնի արդյունավետ պաշտպանություն, դա բխում է ՄԻԵԴ նախադեպային իրավունքի պահանջներից:

«ՄԻԵԴ նախադեպային որոշումներին շատ լավ տեղյակ եմ, տեղյակ եմ նաև Փաստաբանության մասին օրենքին, այն իրավունքները և պարտականությունները, որոնք վերապահված են ինձ օրենսդրությամբ, պետք է կատարեմ բարեխիղճ: Սակայն իմ բարեխղճությունն ամենևին էլ կապված չէ այն հանգամանքների հետ, որոնք կարող եմ շրջանցել»,-ասաց հանրային պաշտպանը:

Նա մեկ անգամ ևս ընդգծելով, որ չի կարող պաշտպանություն իրականացնել, նա միջնորդեց սանկցիայի որոշումը վերանայել, Սեֆիլյանին ու Պողոսյանին դատական նիստերի դահլիճ բերել, հակառակ դեպքում ինքը զրկված է լինելու որևէ դիրքորոշում հայտնելու հնարավորությունից, ինքն առանց իր «պաշտպանյալների» չի կարող որևէ հայտարարություն անել իրենց անունից: Բացի այդ չի կարող նրանց տեղեկացնել դատական գործընթացի մասին:

Պաշտպանական կողմը միացավ միջոնորդությանը, հիմնավոր համարեցին, միջնորդությունը, կարծիք հայտնեցին, որ դատարանը պետք է բավարարի, այն բխում է արդարադատության շահերից:

«Եթե չբավարարի միջնորդությունը իմ ներկայությունը լինելու է զուտ ֆիզիկական և ձևական»,-ասաց Մ. Թովմասյանը:

Մեղադրող կողմն առարկեց, ասաց՝ հիմնավոր չէ, խնդրեց մերժել:

Նախագահող դատավոր Տաթևիկ Գրիգորյանը նշեց, որ դատարանի նկատմամբ հարգալից վերաբերմունք դրսևորելու վերաբերյալ կանոնակարգումները պատահական չեն, դատարանի որոշումն էլ կամայական կերպով չի կայացվել:

«Սանկցիայի որոշումն իրավաչափ է»,-ասաց Տ. Գրիգորյանը, ավելացնելով, որ միջնորդությունը հիմնավորված չէ, պետք է մերժել:

Սեֆիլյանի նկատմամբ սահմանվել է սանկցիա դատարանի նկատմամաբ անհարգալից վերաբերմունք ցուցաբերելու հիմնավորմամբ, նա հեռացվել է դատարանի դահլիճից, Սեֆիլյանն էլ իր պաշտպաններին արգելել է իր բացակայության պայմաններում մասնակցել դատական նիստերին: Դատարանն էլ ամբաստանյալների պարտադիր պաշտպանություն ապահովելու համար արդեն որերորդ անգամ հանրային պաշտպան է նշանակում, Սեֆիլյանն էլ՝ հրաժարվում:

Հիշեցնենք, որ ձեռք բերված փոխկապակցված ապացույցների բավարար համակցության հիման վրա զանգվածային անկարգություններ կազմակերպելու նախապատրաստության, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու և շենքեր, շինություններ զավթելու նախապատրաստության համար Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գևորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին և Ներսես Պողոսյանին մեղադրանքներ են ռաջադրվել ՀՀ քրեական օրենսգրքի 235-րդ հոդվածի 3-րդ մասով: