Ձեր վստահելի աղբյուրը

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվում է «Սամվել Բաբայանի և մյուսների գործով» դատական  նիստը:
Դատախազը ներկայացրեց մեղադրական եզրակացության եզրափակիչ մասը:

Ամբաստանյալ Ժորա Զաքարյանը մեղադրվում է  ՀՀ քրեական օրենսգրքի 38-190-րդ հոդվածի 1-ին մասով (Սամվել Բաբայանի կողմից հանցավոր ճանապարհով ստացված գույքն օրինականացնելուն օժանդակելը): Ամբաստանյալ Ժորա Զաքարյանն ասաց, որ մասնակիորեն ընդունում է իրեն առաջադրված մեղադրանքը:

Սանասար Գաբրիելյանը մեղադրվում ՀՀ քրեական օրենսգրքի 235-րդ  2-րդ մասով  նախատեսված հանցագործոության կատարման մեջ (Սամվել Բաբայանի դրդմամբ, մի խումբ անձանց կողմից նախնական համաձայնությամբ ապօրինի կերպով ռազմամթերք ձեռք բերելը, պահելը և փոխադրելը):

Դատավորի հարցին, թե առաջադրված մեղադրանքում ձեզ մեղավոր ճանաչո՞ւմ եք, ամբաստանյալ Ս. Գաբրիելյանը պատասխաեց. «Երբեք, երբեք»:

Սամվել Բաբայանին մեղադրանք է առաջադրվել ՀՀ քրեական օրենսգրքի 190-րդ հոդվածի 1-ին մասով (հանցավոր ճանապարհով ստացված գույքն օրինականացնելը) և 38-235-րդ հոդվածի 2-րդ մասով (մի խումբ անձանց կողմից նախնական համաձայնությամբ ապօրինի կերպով ռազմամթերք ձեռք բերելուն, պահելուն և փոխադրելուն դրդելը):

«Ես ինձ մեղավոր չեմ ճանաչում»,-հայտարարեց Սամվել Բաբայանը:

Կարեն և Անդրանիկ Քոչարյաններին, Դավիթ Հարությունյանին մեղադրանքներ են առաջադրվել ՀՀ քրեական օրենսգրքի 38-190-րդ հոդվածի 1-ին մասով (Սամվել Բաբայանի կողմից հանցավոր ճանապարհով ստացված գույքն օրինականացնելուն օժանդակելը), Արմեն Պողոսյանին՝ ՀՀ քրեական օրենսգրքի 235-րդ հոդվածի 2-րդ մասով (Սամվել Բաբայանի դրդմամբ, մի խումբ անձանց կողմից նախնական համաձայնությամբ ապօրինի կերպով ռազմամթերք ձեռք բերելը, պահելը և փոխադրելը):

Նրանք իրենց առաջադրված մեղադրանքները չընդունեցին կամ դիրքորոշում չհայտնեցին: