Ձեր վստահելի աղբյուրը

Իսրայելական «Aeronautics» պաշտպանական ընկերությունը հրապարակել է բորսային գործարքների ամփոփագիր, համաձայն որի՝ այդ երկրի պաշտպանության նախարարության արտահանումների վերահսկման բաժինը ժամանակավորապես կասեցրել է «Orbiter K1» տեսակի ԱԹՍ-ների մատակարարումը կարևոր գործընկերոջ:

Այս մասին հաղորդում է «Newsru.co.il»  կայքը՝ հղում անելով իսրայելական «Bizportal» կայքին:

Ըստ աղբյուրի՝ ամփոփագրում նշվում է, որ մատակարարումը պետք է իրականացվի 2017-18թթ-ի ընթացքում, իսկ 2016թ-ին տվյալ գործընկերոջ գնումներից գոյացել է «Aeronautics» ընկերության հասույթի 20%-ն, իսկ 2015թ-ին՝ 18%-ը:

Ընկերության ամփոփագրում չի նշվում գնորդ երկրի անունը, սակայն հիշատակվում է, որ խոսքը գնում է «Ba» վարկունակության ռեյտինգ ունեցող երկրի մասին: Միևնույն ժամանակ հիշատակվում է, որ գնորդ երկրում տեղակայված է գործարան, որն «Aeronautics» ընկերության արտոնագրով ԱԹՍ-ների պահեստամասեր է արտադրում: 

Ըստ «Newsru.co.il» կայքի՝ «Aeronautics»-ի գնորդների ցանկում միայն երկու երկիր՝ Սերբիան ու Ադրբեջանը ունեն «Ba» վարկունակության ռեյտինգ, և միայն Ադրբեջանում է առկա «Aeronautics»-ի արտոնագրով ԱԹՍ-ների պահեստամասերի գործարան: Այդուհանդերձ, Ադրբեջան անունը բորսային գործարքների ամփոփագրում չի հիշատակվում:
Newsru.co.il –ի խմբագրությունը, ինչպես նշված է հոդվածում, պարզաբանման ակնկալիքով դիմել է Իսրայելի պաշտպանության նախարարությանը, սակայն հոդվածի հրապարակման պահի դրությամբ պատասխան չի ստացել:

Ըստ սկզբնաղբյուրի՝ շաբաթներ առաջ իսրայելական «Մաարիվ ա-Շավուա» թերթը գրել է, թե Իսրայելի Պաշտպանության նախարարությունը ճշտում է տեղեկություններն այն մասին, որ իսրայելական «Aeronautics Defense Systems» ընկերության օպերատորները հրաժարվել են ցուցադրել Ադրբեջան մատակարարված նոր ԱԹՍ-ների տեխնիկական հնարավորությունները հայկական զինուժի կենդանի թիրախների վրա:

Հոդվածի հեղինակ Իոսի Մելմանը պնդել է, որ այդ կապակցությամբ դժգոհության նոտա է հղվել Իսրայելի պաշտպանության նախարարությանը: «Aeronautics Defense Systems» ընկերությունում մեղադրանքները հերքել են: Հրապարակման մեջ նշվում է, թե միջադեպը գրանցվել է այն ժամանակ, երբ Բաքու է ժամանել «Aeronautics Defense Systems» ընկերության պատվիրակությունը՝ քննարկելու անօդաչու թռչող սարքերի նոր խմբաքանակի մատակարարման մասին հարցերը:

Հրապարակման մեջ ասվում է, որ ադրբեջանցի զինվորականները խնդրել են թույլտվություն նոր ստացված զինտեխնիկան իրական ռազմական գործողության ընթացքում հայկական զինուժի դեմ փորձարկելու համար, սակայն մերժում են ստացել: Հոդվածում նշվում է նաև, թե ադրբեջանական բանակի ղեկավարությունը նպատակ է ունեցել այդ հարձակման տեսագրությունը հրապարակել՝ սեփական բանակի մարտունակությունը ցուցադրելու նկատառումով:

«Մաարիվ» թերթը հիշեցրել է, որ Իսրայելի Պաշտպանության նախարարության կանոններով՝ ռազմական տեխնիկայի իսրայելցի մատակարարներին արգելվում է ուղղակի կամ անուղղակի մասնակցություն ունենալ տվյալ երկրի տարածքում ընթացող ռազմական գործողություններին, եթե դրա համար չկա Իսրայելի հատուկ ցուցումը:

Ըստ իսրայելական թերթի տեղեկությունների՝ իսրայելական ռազմական տեխնիկան հայկական զինված ուժերի դեմ իրական մարտում փորձարկելու առաջարկից հրաժարված իսրայելցի մատակարարների վրա փորձել են ճնշում գործադրել պատվիրակության ղեկավարները, սակայն օպերատորները հրաժարվել են կատարել նրանց կամքը: Արդյունքում ԱԹՍ-ների կիրառումը զոհերի չի բերել, թեև ընտրված թիրախը խոցվել է:

Ըստ տեղեկությունների՝ հայկական զինուժի դեմ ԱԹՍ-ների կիրառման առաջարկից հրաժարված օպերատորներից մեկը ավելի ուշ իր դիմումի համաձայն ազատվել է  «Aeronautics Defense Systems» ընկերությունում իր զբաղեցրած պաշտոնից, իսկ մյուսը պատրաստվում է ազատվել:
Ըստ աղբյուրի՝ «Aeronautics Defense Systems» ընկերության մամուլի ծառայությունը կտրականապես հերքել է հիշյալ տեղեկությունները. «Ընկերությունը երբեք զինտեխնիկայի փորձարկում չի իրականացնում կենդանի թիրախի վրա: Նույնը վերաբերում է այս դեպքին»,-նշվում է ընկերության պաշտոնական հայտարարությունում: