Ձեր վստահելի աղբյուրը

«Մենք տարակուսած ենք բարձրացված մեծ աղմուկից, քանի որ դրա համար որևէ հիմք չկար»,- այս մասին այսօր լրագրողների հետո զրույցում ասաց ՀՀ առողջապահության նախարարության բժշկական օգնության քաղաքականության վարչության պետի պաշտոնակատար Դավիթ Մելիք Նուբարյանն՝ անդրադառնալով հեմոդիալիզով հիվանդների կողմից բարձրացված բողոքին:

Նշենք, որ երեկ հեմոդիալիզով մի շարք հիվանդներ ահազանգել են, որ, մասնավորապես «Աստղիկ» ԲԿ-ում հրաժարվել են դիալիզով հիվանդներին անվճար սպասարկել,  քանի որ ՀՀ առողջապահության նախարարությունը դադարեցնում է պետպատվերը դիալիզի համար:

Ավելի ուշ Առողջապահության նախարարությունը հայտարարությամբ հերքեց այս տեղեկությունը՝ հաղորդելով, սոցիալական ցանցում տարածված եղեկատվությունը, թե իբր դադարեցվում է հեմոդիալիզի պետպատվերը` իրականությանը չի համապատասխանում: ՀՀ կառավարության  օգոստոսի 24-ի նիստում հաստատվել է  նախարարության 2017 թվականի ընթացքում առաջացած տնտեսումներից հեմոդիալիզի ծառայությանը լրացուցիչ 216 մլն 820 հազար ՀՀ դրամ ուղղելու մասին ՀՀ կառավարության որոշումը։ «Հատկացված լրացուցիչ գումարը, վստահաբար, կբավականացնի մինչև 2017թ. ավարտը հեմոդիալիզի ծառայությունն ամբողջությամբ պետական պատվերի շրջանակում իրականացնելու համար»,- ասված է ԱՆ հաղորդագրությունում։

Մինչդեռ այս հայտարարությունից հետո էլ մի քանի հիվանդներ այսօր հավաքվել էին Առողջապահության նախարարության շենքի մոտ: Նրանք մտավախություն ունեն, որ 2018 թվականի հունվարից կդադարեցվի պետական ֆինանսավորումը:

Ռուբեն Մնացականյանը լրագրողների հետ զրույցում ասաց, որ երեկ «Աստղիկ» ԲԿ-ում իրենց ասել են՝  դիալիզով հիվանդներին չեն կարող անվճար սպասարկել, քանի որ առողջապահության նախարարությունը դադարեցնում է պետպատվերը դիալիզի համար: «Ասացին, որ հիվանդանոցը միջոցներ չունի, դրա համար սեպտեմբերի 10-ից հետո, ով ուզում է դիալիզ ընդունի, պետք է ինքը վճարի՝  18 100 դրամ ամեն մի դիալիզի համար: Երեկ երեկոյան առողջապահության նախարարությունը հայտարարություն տարածեց, որ գումար են փոխանցել և մինչև նոր տարի դիալիզ կանեն, բայց հիմա մտավախություն ունենք, որ հաջորդ տարի էլ նման խնդրի առաջ կկանգնենք»,- նշեց Ռուբեն Մնացականյանը:

Դավիթ Մելիք Նուբարյանն էլ լրագրողների հետ զրույցում վստահեցրեց, որ  մտահոգվելու որևէ հիմք չկա,  առողջապահության նախարարությունը որևէ քայլ չի ձեռնարկել փոխել հեմոդիալիզի ծառայության ներկայիս գործող մեխանիզմները: «Այսինքն՝ որևէ նախադրյալ չկա, առողջապահության նախարարությունը հաստատակամ է բարեփոխումների իրականացման հարցում և ունի մեկ նպատակ՝ պահպանել և բարձրացնել մարդկանց բուժման որակը և նվազեցնել ստվերը»,- նշեց նա:

ԱՆ ներկայացուցչին հատկապես զարմացնում է այն փաստը, որ ծրագրի դադարեցման մասին խոսում են այս շաբաթ, մինչդեռ նախորդ շաբաթ գործադիրի նիստում հաստատվել է  հեմոդիալիզի ծառայությանը լրացուցիչ 216 մլն 820 հազար դրամ ուղղելու մասին ՀՀ կառավարության որոշումը։

Հարցին, թե ինչու նախարարությունը նախապես չի տեղեկացրել բուժհաստատություններին, որպեսզի նման խնդիր չառաջանար, Դավիթ Մելիք Նուբարյանը նշեց, որ Երևանում կա 5 դիալիզ մատուցող բուժկենտրոն և խնդիրն առաջացել է միայն մեկ հիվանդանոցի հետ, այլ կենտրոններից իրենք ահազանգ չեն ստացել:

Դիտարկմանը, թե ինչու «Աստղիկ» ԲԿ-ում չգիտեին, որ ծրագիրը շարունակվում է, ԱՆ պաշտոնյան խորհուրդ տվեց այդ հարցով դիմել բուժկենտրոնի տնօրենին:  «Մենք մեր բոլոր գործընկերների հետ աշխատում ենք նույն սկզբունքով: Աշխատանքային կարգով բոլոր կենտրոններն էլ տեղեկացվում են, որ կա խնդիր, սակայն նախարարությունն աշխատում է խնդրի լուծման ուղղությամբ: Այսինքն՝ նախարարությունը չի հրաժարվել հեմոդիալիզով հիվանդներին տրամադրվող անվճար բուժսպասարկումից: Ես չեմ կարծում, որ որևէ բուժկենտրոն չի իմացել դրա մասին»,- ընդգծեց նա:  

Մանրամասները՝ տեսանյութում: