Ձեր վստահելի աղբյուրը

«Որևէ օրենքում նշված չէ, որ փաստաբանն իր իրավաբանական օգնության տրամադրելու ժամանակ պարտավոր է ենթարկվել կարդագրիչներին»,- «Մեդիա կենտրոնում» «Փաստաբանների գործադուլ հայտարարելու դրդապատճառներն ու պահանջները» թեմայով քննարկմանն ասաց փաստաբան  Տիգրան Հայրապետյանը՝ խոսելով փաստաբանների՝ դատարաններում զննությունների,  խուզարկություններ մասին:

Նա համաձայն չէ, որ, ընդհանրապես, փաստաբանը զննության ենթարկվի. «Դատական օրենսգրքում  հստակ նշված է, որ դատավորը չի կարող զննության ենթարկվել, կարող է զննության ենթարկվել հատուկ պայմաններում, երբ որ դատարանի նախագահը զգուշացված է: Այդ նույն անալոգիայով, իմ խորին համոզմամբ, նաև փաստաբանը չի կարող զննության ենթարկվել»:

Տ. Հայրապետյանի խոսքով, կարգադրիչների գործողությունները բազմազան են՝ ընդհուպ խուզարկության ամենավերջին աստիճանից, որ տրամաբանությունից դուրս է, կողմնակալ: 

«Դատախազները թատերական ներկայացում են անում, որ իբրև թե իրենք էլ զննություն անցնում, բայց իրենք  արտոնված մուտքով, ելքով դուրս են գալիս»,- ասաց փաստաբանը:

Նա նշեց, որ արդեն բոլոր դատարաններում  են փորձում ձևական նույն գործընթացը տանել՝ իբրև օրենքի պահանջն էր:

«Փորձում են իրենց անօրինական գործողություններով օրենքի շղարշ ստեղծել, բայց դա այդպես չէ: Ճիշտը զննելն է, խնդրեմ, Ազգային ժողովում ընդունեք օրենք  բոլոր ընթացակարգերով և զննեք, եթե անգամ պետք է խուզարկեք,  խուզարկեք, բայց օրենքով սահմանված կարգով»,- ասաց Տ.Հայրապետյանը: