Ձեր վստահելի աղբյուրը

Ինչպես և ծրագրում էինք, սեպտեմբերի մեկից այս հիասքանչ համալիրը կդառնա տուն մեր ռազմամարզական կարևորագույն հաստատության ավագ դպրոցի մեր աշակերտների համար, որտեղ նրանք երեք տարիների ընթացքում կպատրաստվեն ռազմական խորացված կրթությամբ լավագույն ակադեմիական ծրագրերով: Այս մասին լրագրողներիհետ հանդիպման ժամանակ նշեց պաշտպանության նախարար Վիգեն Սարգսյանը: 

Նախարարը հույս հայտնեց, որ «Մոնթե Մելքոնյանի անվան ռազմամարզական վարժարանի» սաների մեծ մասը կընտրի սպայական մասնագիտությունը, որպես հիմնական մասնագիտություն և կշարունակեն ուսումը ՌՈւՀ-երում:

«Ես շատ ուրախ եմ, որ հոգաբարձուների խորհուրդը ձևավորվել է գիտակ կարող մարդկանց կողմից և այդ մարդիկ կարող են իրենց ներդրումը բերել այս վարժարանի կայացմանը»,- նշեց Վիգեն Սարգսյանը:

Նախարարի հավաստմամբ, առաջին անգամ տեղի է ունեցել մրցութային ընդունելություն՝ 3 դիմորդ մեկ տեղի համար:

«Վստահ եմ, որ հաջորդ տարի էլ ավելի բարձր թիվ կունենանք: Ընտրվել է շատ արհեստավարժ մանկավարժական կոլեկտիվ: Այստեղ ստեղծված են բոլոր պայմանները և ակադեմիական աշխատանքի և մարզական գործունեության համար»,- նշեց նախարար Սարգսյանը և վստահություն հայտնեց, որ տղաները՝ գալով վարժարան ոգևորվելու են, ոգեշնչվելու են ավելի լավ կատարելու իրենց աշխատանքը:

Նախարարի խոսքով, վարժարանում այս տարի ուսանելու են 210 աշակերտ հանրապետության բոլոր մարզերից:

Աղջիկների ընդունելության հնարավորթւայն մասին նախարարն ասաց, որ Վարժարանը ավանդաբար միշտ եղել է արական սեռի աշակերտների համար, և այդ ավանդույթը պահպանվում է:

«Սակայն հետաքրքրություն կա և առհասարակ կանանց մեջ մեծ հետաքրքրություն կա դեպի զինվորական մասնագիտությունը, դեպի ծառայությունը: Կարծում եմ հաջող փորձի դեպքում, ժամանակի մեջ հնարավոր է, որ մենք մտածենք աղջիկների համար առանձին վարժարան ունենալ»,- նշեց նա և հավելեց, որ շատ հպարտ է 2 օր առաջ կատարած իր նշանակմամբ:

«Առիթն օգտագործելով ուզում եմ ասել, որ շատ հպարտ եմ, որ 2 օր առաջ առաջին անգամ զինված ուժերի պատմության մեջ նշանակում եմ կատարել բարձրագույն պաշտոններից մեկում՝ ռազմաբժշկական վարչության պետ նշանակվել է կին: Եվ սա մեր ԶՈւ պատմության մեջ առաջին կինն է, որը զբաղեցնում է բարձրագույն սպայական պաշտոն: Փոխգնդապետ Գայանե Հովհաննիսյանը երկար տարիներ ղեկավարել է կենտրոնական զինվորական հոսպիտալի վերակենդանացման բաժանմունքը, ռազմական բժիշկ է, մարտական ուղի անցած և շատ լավ կազմակերպիչ: Վստահ եմ որ նա մեծ հաջողություններ է գրանցելու ռազմաժշկական ծառայության կայացման գործում»,- նշեց նախարարը: