Ձեր վստահելի աղբյուրը

«Առողջապահության նախարարությունը պետք է ավելի արագ արձագանքներ, բնակչության հետ կապը պետք է ավելի ակտիվ լիներ»,-«Մեդիա կենտրոնում»  «Հրդեհ «Նաիրիտում». էկոլոգիական ռիսկեր և գնահատականներ պետական կառույցների աշխատանքին» թեմայով քննարկմանն ասաց ԱԺ «Ելք» խմբակցության պատգամավոր Լենա Նազարյանը:

Նա նշեց, որ հրդեհից միայն հինգ ժամ հետո առողջապահության նախարարությունը  հանդես եկավ հայտարարությամբ, մինչդեռ անտեղի խուճապը կանխելու համար հարկավոր էր հայտարարությունը լիներ ավելի շուտ, նաև՝ ինչ անեն մարդիկ այդ իրավիճակում:

«Եթե նույնիսկ բարձրաստիճան թունավորություն չկար, բայց ակնհայտ էր, որ մուրը վնասակար էր առողջության համար, պետք է տրվեին պարզագույն խորհուրդներ, թե ինչպես մարդիկ վարվեին այդ իրավիճակում»,- ասաց պատգամավորը:

Քննարկմանը ներկա մեդիա փորձագետ Սամվել Մարտիրոսյանն ասաց, որ պետք է բնակչության հետ խոսել մարդկային լեզվով:

«Այսինքն՝ եթե ասում են, որ ծծմբի օքսիդի պարունակությունը մի քանի անգամ բարձր է, ոչինչ չեն ասում: Պետք է ասեն, օրինակ, այս ինչ շառավիղով ինչ-որ տիպի հիվանդություն ունեցող մարդկանց համար բացահայտ վտանգ  կա, կամ ասեն՝ ոչ մեկին վտանգ չի սպառնում»,- նշեց նա՝ ընդգծելով, որ հանրության հետ քիմիայի տերմիններով շփվելը լավագույն ձևը չէ:

Ս. Մարտիրոսյանը նաև ասաց, որ նախարարությունները  պետք է ունենան հստակ արձանագրություններ, որ նման իրավիճակում մարդկանց  պետք է իրազեկել նման կերպ:

«Իրազեկումը չպետք է կախված լինի թե այդ օրը լրատվական բաժնից ով է գործի եկել, ով ոչ: Սա խնդիր է»,- նշեց մեդիա փորձագետը:

Նրա խոսքով, չկա հստակ քաղաքականություն, թե սոցցաներում ինչպես իրենց պահեն պետական մարմինների հանրային կապերի պատասխանատուները:

Հիշեցնենք, որ օգոստոսի 28-ին Երևան քաղաքի «Նաիրիտ» գործարանի տարածքում հրդեհ էր բռնկվել: