Ձեր վստահելի աղբյուրը

Օգոստոսի 29-ին ԱՄՆ-ում մեկնարկել է Թուրքիայի նախագահ Ռեջեփ Թայիփ Էրդողանի թիկնապահների կողմից խաղաղ ցուցարաների վրա հարձակման միջադեպի գործով  դատը:

«Էրմենիհաբեր»-ի փոխանցմամբ, բախմանը մասնակից 19 հոգին  (որից 15-ը Էրդողանի թիկնապահներն են) մեղադրվում են ատելության հողի վրա բռնություն գործադրելու, ինչպես նաև զենքի կիրառմամբ հաձակման փորձ իրականացնելու մեջ:

Ըստ ամերիկյան օրենքների՝ ներկայացված մեղադրանքով վերոնշյալ անձանց սպառնում է մինչև 15 տարվա ազատազրկում:

Աղբյուրը հայտնում է, որ որոշ մեղադրայլների նկատմամբ  կան  լրացուցիչ  մեղադրանքներ ևս:
Թուրքիայի նախագահի 12 թիկնապահների նկատմամբ կալանավորման որոշումը կայացվել էր դեռևս հունիսին:  Նույն ամսին Միացյալ Նահանգների մայրաքաղաք Վաշինգտոնի ոստիկանությունը հետախուզում էր հայտարարել թիկնապահների նկատմամբ:Մեկնարկած դատական գործի շրջանակներում դատախազությունը մեղադրանք է առաջադրել ևս 3 թիկնապահի և 4 ազգությամբ թուրք քաղաքացիների նկատմամբ, որոնցից 2-ը ԱՄՆ-ի քաղաքացիներ են,  2-ը՝ Կանադայի:

Աղբյուրը հիշեցնում է, որ մայիսի  16-ին  ԱՄՆ-ի հայ, քուրդ, ասորի և եզդի համայնքների ներկայացուցիչները ցույց էին կազմակերպել Վաշինգտոնում՝  բողոքելով Էրդողանի` ԱՄՆ այցի դեմ: Էրդողանի թիկնապահները հարձակվել էին խաղաղ ցուցարարների վրա և դաժան ծեծի ենթարկել նրանց:

Միջադեպի հետևանքով վիրավորվել էր 9 ցուցարար: ԱՄՆ ներկայացուցիչների պալատի անդամ Էդ Ռոյսը պահանջել է պատասխանատվության ենթարկել բախումը հրահրած Թուրքիայի նախագահի թիկնապահներին: Սենատոր Ջոն Մըքքեյնը պահանջել է արտաքսել ԱՄՆ-ում Թուրքիայի դեսպանին: