Ձեր վստահելի աղբյուրը

Մինսկի խմբի ամերիկացի նախկին համանախագահ Ռիչարդ Հոգլանդի՝ ԼՂ հակամարտության կարգավորման վերաբերյալ վերջին հայտարարության մեջ որևէ նոր բան չկար: Հոգլանդն ասել է այն, ինչ դրված է բանակցությունների սեղանին: Իրականում վերջին շրջանում բանակցություններ են ընթանում ոչ թե ղարաբաղյան հակամարտության կարգավորման այլ ընդամենը բանակցությունները վերականգնելու շուրջ: Լրագրողների հետ այսօր կայացած հանդիպման ժամանակ այս մասին ասաց ԱԺ պատգամավոր Շիրակ Թորոսյանը:

«Խոսքը գնում է երեք հայտնի սկզբունքների մասին: Ես որևէ արտառոց բան չեմ տեսնում: Այս սկզբունքների շուրջ գրեթե կա կոնսենսուս ԵԱՀԿ Մինսկի խմբի կողմից: Միակ խոչընդոտը հանդիսանում է Ադրբեջանը, որը, խախտելով բոլոր նորմերը, ապրիլին սանձազերծեց պատերազմ: Ապրիլյան պատերազմից հետո Հայաստանի դիրքորոշումը կոշտացել է, ավելին, պետք է կոշտացվեր կազանյան հանդիպումից հետո: Պետք է գալ մի հարթություն, որտեղ օբյեկտիվորեն հնարավոր է բանակցություններ վարել»,- ընդգծեց խորհրդարանականը:

Շիրակ Թորոսյանի խոսքով, բոլոր իրողությունները ցույց են տալիս, որ Ադրբեջանը պատերազմ սկսելու կամք և պատրաստակամություն առայժմ չունի: Պատճառն այն է, որ նա վստահ չէ իր հաղթնակի վրա, այլապես րոպե առաջ կհարձակվեր:

«Ապրիլյան պատերազմը զոնդաժ էր՝ ստուգելու հայկական կողմի ուժերը: Ինչ վերաբերում է Նախիջևանից հնարավոր ճակատ բացելու խոսակցություններին, ապա վստահ եմ, որ ճակատ չի բացվի: Այդ դեպքում խոսքն այլևս կգնա հայ-ադրբեջանական պատերազմի մասին, իսկ մեզ այլ բան չի մնա, քան ուղղակի վերցնել Նախիջևանը: Այլ պարագայում անգամ փոքր հեռահարության ցանկացած հրթիռ կարող է հասնել Երևան: Այսպես մենք տանուլ կտանք ամեն ինչ»,- համոզմունք հայտնեց պատգամավորը:

Հարցին՝ ինչպե՞ս կմեկնաբանի Հայաստանում ԱՄՆ դեսպան Ռիչարդ Միլսի՝ օրերս արած այն հայտարարությունը, որ ԱՄՆ ցանկանում է Հայաստանին գործիքներ տալ՝ ինքնիշխան որոշումներ կայացնելու համար, Շիրակ Թորոսյանը նկատեց՝ չի ցանկանում  մեկնաբանել որևէ խոսք, որում կասկածի տակ է դրվում ՀՀ ինքնիշխանությունը:

Անդրադառնալով հայ-իսրայելական հարաբերություններին՝ պատգամավորը համոզմունք հայտնեց՝ դրանք զարգացման ներուժ ունեն: «Սա շատ բարդ, սակայն ոչ անհնար գործընթաց է լինելու»,- ասաց Թորոսյանը:

Վերջում ջավախքահայ պատգամավորը հայտնեց՝ ինքը շատ ուրախ է, որ ինը տարվա ընդմիջումից հետո կարողացել է հատել հայ-վրացական սահանը և հայրական տուն այցելել: 

«Ինչ վերաբերում է հայ-վրացական հարաբերություններին, ապա Վրաստանում ձևավորվում են առողջ ուժեր: Հայ-վրացական բարեկամական հարաբերություններին նոր-նոր  ենք սկսում ականատես լինել: Միխեիլ Սաակաշվիլիի նախագահության տարիներին դրանք խիստ ձևական բնույթ էին կրում՝ կենացների մակարդակի:

Իսկ ընդհանրապես Վրաստանը հրաշալի գիտակցում է, որ Թուրքիան և Ադրբեջանը, հսկայական փողեր ներդնելով վրացական տնտեսության մեջ, ինչ-որ պահի կարող են փորձել ազդեցություն բանեցնել նաև քաղաքական դաշտում»,- ամփոփեց Շիրակ Թորոսյանը: