Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվող ՊՊԾ գնդի գրավմանը մասնակցած խմբից 18 անդամների դատավարության ժամանակ ամբաստանյալ Սերգեյ Կյուրեղյանի կողմից նախագահող դատավոր Արտուշ Գաբիրելյանին ներկայացված ինքնաբացարկի միջնորդությունը դատարանի որոշմամբ մերժվեց: Խորհրդակցական սենյակից վերադառնալուց հետո հայտարարեց դատավոր Ա. Գաբրիելյանը:

Այնուհետև դատավորը հարցրեց Կյուրեղյանին, թե արդյոք համաձայն է, որ դատարանում նրա շահերը պաշտպանի հանրային պաշտպանի գրասենյակից փաստաբան Լիանա Գասպարյանը:

«Ես ևս մի քանի միջնորդություններ ունեմ: Դրանք հրատապ են»,- հայտարարեց ամբաստանյալ Ս. Կյուրեղյանը:

Դատավորը նշեց, որ այդ միջնորդությունները քննության առարկա կլինեն հետագայում:

«Չեմ ցանկանում մասնակցել դատավարությանն առանց իմ միջնորդությունները ներկայացնելու: Իրավունք ունեմ նրեկայացնելու իմ միջնորդությունները»,- ասաց Կյուրեղյանը:

«Դատավարությանը չե՞ք ցանկանում մասնակցել, խնդրում եմ ուղեկցեք»,- ասաց դատավորը, որից հետո ամբաստանյալ Ս. Կյուրեղյանին նիստերի դահլիճից հեռացրեցին:

Այնուհետև դատավորը հայտարարեց. «Նկատի ունենալով այն հանգամանքը, որ Կյուրեղյանը որևէ դիրքորոշում չհայտնեց հանրային պաշտպան ներգրավելու հետ կապված, ուստի, հաշվի առնելով այն հանգամանքը, որ նրա նկատմամբ կիրառվել է դատական սանկցիա և դատարանն իր նախաձեռնությամբ, օրենքով սահմանված կարգով պաշտպանի պարտադիր մասնակցության համար  դատարան է հրավիրել հանրային պաշտպան Լիանա Գասպարյանին, պաշտպանական իրավունքից  օգտվելու հնարավորություն ընձեռելու նպատակով դատարանը որոշեց Լիանա Գասպարյանին  ներգրավել Սերգեյ Կյուրեղյանի շահերի պաշտպան»,- հայտարարեց դատավորը:

Փաստաբան Լ. Գասպարյանն ասաց, որ որևէ ներգրավվում տեղի չի ունենում, քանի որ Քրեական դատավարության օրենսգրքի համաձայն ներգրավվում լինում է այն ժամանակ, երբ անձը տալիս է իր համաձայնությունը, իսկ այս դեպքում անձը որևէ կարծիք չհայտնեց՝ լքելով դատական նիստերի դահլիճը:

«Դա ձեր միանձանյա որոշումն է, որն անօրինական գործողություն է, հարգելի դատարան»,- ասաց Լ. Գասպարյանը:

Այնուհետև դատավորն ամբաստանյալ Թորոս Թորոսյանից հետաքրքրվեց, թե արդյոք համաձայն է, որ իր շահերը պաշտպանի հանրային պաշտպան Լիանա Գասպարյանը, քանի որ նախորդ նիստին հրաժարվել էր փաստաբան Լիպարիտ Սիմոնյանի պաշտպանությունից:

«Ես հրաժարվել եմ Լիպարիտ Սիմոնյանի պաշտպանությունից այն ժամանակահատավածի համար, երբ որ ես չեմ գտնվելու դահլիճում, այսինքն դուք իմ հանդեպ սանկցիա եք կիրառել: Երբ որ սանկցիայի ժամանակահատավածը կլրանա, այդ ժամանակ կպատասխանեմ հարցին»,- ասաց Թ.Թորոսյանը:

«Հաշվի առնելով այն հանգամանքը, որ ամբաստանյալ Թորոս Թորոսյանը հրաժարվում է պատասխանել հարցին, օրենքով սահմանված կարգով, նկատի ունենալով, որ  նրա նկատմամբ դատական սանկցիա է կիրառվել, իսկ պաշտպանի մասնակցությունը  պարտադիր է,  նրա պաշտպանական  իրավունքները չոտնահարելու համար Լիանա Գասպարյանը ներգրավվում է Թորոս Թորոսյանի շահերի պաշտպան»,- հայտարարեց դատավորը:

Լիանա Գասպարյանը դատարանին միջնորդություն-պահանջ ներկայացրեց՝ դիմել Սահմանադրական դատարան ամբաստանյալի ցանկությանը հակառակ հանրային պաշտպան ներգրավելու հետ կապված: Դատավորը հայտարարեց, որ դատարանը միջնորդությունը թողնում է առանց քննության՝ ՀՀ Քրեական դատավարության օրենսգրքի 102-րդ հոդվածի 2-րդ մասով՝ որպես ոչ ժամանակին հարուցված միջնորդություն:

Փաստաբան Ինեսա Պետրոսյանն ասաց, որ առարկում է դատավորի անօրինական գործողությունների դեմ. «Միանշանակ է, որ այս գործը փակուղի եք մտցնում: Ինչո՞ւ եք այդքան անօրինականություն թույլ տալիս: Մենք պարտավոր չենք հանդուրժել ձեր այսչափ անօրինական գործողությունները»:

Դատական  հաջորդ նիստը կայանալու է սեպտեմբերի 7-ին: