Ձեր վստահելի աղբյուրը

Փորձագետները պետք է իրենց խոսքն ասեն՝ տեղում գնահատելով իրավիճակը: Անդրադառնալով նախօրեին ԵԱՀԿ դիտորդական խմբի վրա արձակված ադրբեջանական կրակոցներին, ամենշաբաթյա ասուլիսում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան: Այս մասին տեղեկանում ենք ՌԴ ԱԳՆ պաշտոնական կայքից:

«Հակամարտությունների սրման կամ լարման շրջանում մենք մշտապես և ավանդաբար կողմերին կոչ ենք արել ցուցաբերել հավասարակշռված մոտեցում, որի նպատակը ոչ թե իրավիճակի լարումը կլինի, այլ քաղաքական կարգավորման ուղղությամբ շարժվելը: Դուք գիտեք մեր ավանդական գնահատականը»,- հայտարարել է Զախարովան։

ԼՂ հակամարտության կարգավորման բանակցային սեղանին «Լեռնային Ղարաբաղի de facto» վերադառնալու անհրաժեշտության վերաբերյալ հարցին Զախարովան կարճ պատասխան է տվել՝ «այս հարցում մեր ավանդական դիրքորոշումը հայտնի է»:

Անդրադառնալով ԵԱՀԿ ՄԽ ամերիկացի համանախագահ Ռիչարդ Հոգլանդի հայտարարությանը կարգավորման սկզբունքների վերաբերյալ, Զախարովան նշել է, որ այդ հայտարարությունները նոր չեն, դրանց բազմիցս հղումներ են արել ՌԴ-ի, ԱՄՆ-ի և Ֆրանսիայի նախագահները ԼՂ հակամարտության կարգավորման վերաբերյալ 2009-2013թթ. տարածած համատեղ հայտարարություններում: 

ԵԱՀԿ ՄԽ նորանշանակ ամերիկացի համանախագահի վերաբերյալ էլ ՌԴ ԱԳՆ պաշտոնական ներկայացուցիչը հայտարարել է. «Մենք նրան ողջունում ենք: Ենթադրում ենք, որ համանախագահները համալրված կազմով կշարունակեն իրենց ջանքերը կողմերին աջակցուցուն ցուցաբերել հակամարտության կարգավորման հարցում: Հույս ունենք, որ թիմային մոտեցումը, որը հատուկ է եղել «եռյակին», կպահպանվի»,- նշել է Զախարովան: