Ձեր վստահելի աղբյուրը

Մի քանի օրից՝ նախնական տվյալներով սեպտեմբերի 8-ին, Մոսկվայում կկայանա Ամենայն Հայոց Կաթողիկոս Գարեգին Բ-ի և Կովկասի մահմեդականների վարչության նախագահ, Շեյխ Ուլ Իսլամ Ալլահշուքյուր Փաշազադեի հանդիպումը։ Հայտնի է, որ երկու երկրների կրոնական առաջնորդները կքննարկեն ղարաբաղյան հակամարտությանն ու տարածաշրջանային խաղաղությանն առնչվող հարցեր։ Թե որքան առարկայական կլինեն հանդիպման արդյունքները և ինչ կարելի է ակնկալել հանդիպումից, Panorama.am-ի թղթակիցը թեմայի շուրջ զրուցեց հասարակական գործիչ Կարինե Դանիելյնաի հետ։

Վերջինս մեծ հույս հայտնեց, որ երկու հոգևորականների հանդիպումը հաշտության և խաղաղության եզրեր կառաջացնի հայ և ադրբեջանցի ժողովուրդների միջև։

«Համոզված եմ, որ աշխարհում  խաղաղություն չի լինի, մինչև մեծ կրոնները չմիավորվեն հանուն խաղաղության պայքարում։ Ես շատ եմ կարևորում կրոնական առաջնորդների հանդիպումները և այս հանդիպումը՝ նույնպես։ Կարծում եմ՝ այն արդյունք կտա, պարզապես ժամանակ է հարկավոր։ Արդյունքները մեծապես կախված են ընդունվելիք հայտարարությունից, թե որքանով այն կկարողանա կողմերին ընդհանուր փոխզիջման բերել։ Վերջապես, բոլոր կրոնները խաղաղություն են քարոզում, բոլոր կրոններն էլ խաղաղասեր են»,- նշեց մեր զրուցակիցը։

Հասարակական գործիչ, ազգագրագետ Հրանուշ Խառատյանի հետ էլ զրուցեցինք  ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանի և պատգամավոր Մանե Թանդիլյանի՝ առաջիկայում Բաքու կատարելիք աշխատանքային այցի մասին։

Վերջինս նշեց, որ շատ դրական է վերաբերում հայկական պատվիրակության պաշտոնական այցին։ «Ես այս այցը շատ նորմալ եմ համարում։ Ավելին, ադրբեջանցիները խելացի կվարվեն, եթե իրենք էլ գան և մասնակցեն Երևանում կայացող քննարկումներին։ Նրանք շատ գավառական, ոչ ընկալելի դիվանագիտություն են իրականացնում»,- ամփոփեց մեր զրուցակիցը։