Ձեր վստահելի աղբյուրը

«Հրդեհներից ոչ մի երկիր ապահովագրված չէ: Եվրոպական, ամերիկյան երկրները, մեր տարածաշրջանի երկրները հաճախակի են հրդեհների զոհ դառնում, բնական պրոցես է»,- լրագրողների հետ հադիպմանն ասաց ՀՀ բնապահպանության նախարարության շրջակա միջավայրի պահպանության քաղաքականության վարչության պետ Գագիկ Մանուչարյանը:

Նա նշեց, որ «Խոսրովի անտառ» պետական արգելոցում բռնկված հրդեհը բնութագրվել էր 5-րդ կարգի: Աշխարհում ամենաբարձրը 6-րդ կարգն է:

«Խոսրովի արգելոցի հրդեհը մարվեց ընդամենը 3-4 օրում: Հետևեք աշխարհի լրատվամիջոցներին և կտեսեք, թե 5-րդ կարգի հրդեհներն առաջադեմ երկրներում քանի օրում են մարվում»,- ասաց նա:

Գ. Մանուչարյանի գնահատմամբ, իրավիճակից կարողացել են դուրս գալ ժամանակին: Միաժամանակ նա նշեց, որ ընդունում են, որ տեխնիկապես հագեցված չեն, բայց պետք է հաշվի առնել նաև տեղանքը:

Նշենք, որ «Խոսրովի անտառ» պետական արգելոցի տարածքում երեկ կայծակի հետևանքով կրկին հրդեհ էր բռնկվել:

«Ամեն ժամ էլ հրդեհի վտանգ կա, քանի որ չոր խոտ կա: Երեկվա հրդեհը, իրոք, կայծակի հետևանք էր: Առաջին հրդեհի բռնկման դեպքում միակ բանը, որ կարող ենք բացառել, կայծակն է: Առայժմ չենք կարող ասել ծագման բնույթը, հարուցված է քրեական գործ»,- ասաց նա:

Ասուլիսին ներկա բնապահպան, աշխարհագրական գիտությունների դոկտոր, կենսաբանական գիտությունների թեկնածու, «Հանուն կայուն մարդկային զարգացման» ՀԿ նախագահ Կարինե Դանիելյանն ասաց, որ այսօր ամբողջ աշխարհում են արտակարգ իրավիճակներ լինում՝ ջրհեղեղ, ցունամի, հրդեհներ:

«Ինձ անհանգստացնում է, որ Հայաստանը  ոչ տեխնիկապես, ոչ հոգեպես պատրաստ չէ այդ արտակարգ իրավիճակներին, որոնք ստեղծվել է աշխարհում: «Խոսրովի» արգելոցում, «Նաիրիտ»-ում բռնկված հրդեհներն ապացուցուցին դա: Կարծես թե մեզ համար հայտնություն էր, որ այսքան դժվարություններ ունենք, այսքան պայթյունավտանգ, հրդեհավտանգ թափոններ ունենք, «Խոսրով»-ում կապը չի գործում, ճանապարհներ չկան»,- նշեց բնապահպանը:

Կ. Դանիելյանի խոսքով, այժմ պետք է Հայաստանի տարածքի ամենառիսկային գոտիների գույքագրում արվի, նախազգուշական գործունեություն ծավալվի: Նա նշեց, որ իրեն անհանգստացնում է Հայաստանի տարածքում գտնվող 21 պոչամբարները, որոնք լցված են թունավոր նյութերով, ծանր մետաղներով:

«Հայաստանը պոչամբարների, հանքավայրերի, ծանր մետաղներով թունավորման շնորհիվ դառնում է խիստ վտանգավոր մի տարածք այս մոլորակի վրա: Մենք հիմա շտապ գործողությունների պլան պետք է մշակենք ու իրականացնենք»,- ասաց Կարինե Դանիելյանը: