Ձեր վստահելի աղբյուրը

Այսօր օպերային երգչուհի, սոպրանո,  Հայաստանի Հանրապետության ժողովրդական արտիստ  Հասմիկ Պապյանի ծննդյան օրն է. ծնվել է Երևանում 1961 թվականին: 

Հասմիկ Պապյանը ավարտել է Կոմիտասի անվան Երևանի պետական կոնսերվատորիան նախ որպես ջութակահար, ապա որպես երգիչ (Մ. Հարությունյանի դասարան)։ Ա. Սպենդիարյանի անվան օպերայի և բալետի ազգային ակադեմիական թատրոնում իր դեբյուտից հետո, նա հրավիրվել է  Բոննի և Դյուսելդորֆի օպերային թատրոններ՝ որպես մենակատարներից մեկը։

Շուտով նա դուրս է եկել միջազգային ասպարեզ, և այդ ժամանակից ի վեր ելույթներ ունեցել բազմաթիվ թատրոններում, այդ թվում աշխարհի ամենահեղինակավոր օպերային բեմերում և համերգային սրահներում, ինչպիսիք են՝ Մետրոպոլիտեն օպերան և Կարնեգի Հոլլը Նյու Յորքում, Սան Ֆրանցիսկոյի օպերան, Վաշինգտոնի Ազգային օպերան, Միլանի Լա Սկալան, Փարիզի Բաստիլ օպերան, Բարսելոնի Լիսեու մեծ թատրոնը, Մադրիդի թագավորական թատրոնը, Լոնդոնի Վիգմոր Հոլլը,Վիեննայի պետական օպերան և Վիեննայի Մուսիկվերենը, Ամստերդամի Նիդեռլանդական օպերան, Ցյուրիխի օպերան, Սանկտ Պետերբուրգի Մարիինյան թատրոնը, ինչպես նաև Մյունհենի, Շտուտգարտի, Համբուրգի, Դրեզդենի և Բեռլինի պետական օպերաները։

 Հանդես է եկել հետևյալ օպերաներում՝ Մոցարտի «Դոն Ջիովաննի» (Դոննա Աննա), Բելլինիի «Նորմա» (Նորմա), Ռոսսինիի «Վիլհելմ Տելլ» (Մաթիլդա), Հալևիի «Ջհուդուհի» (Ռաքել), Բիզեի «Կարմեն» (Միկաելա), Պուչինիի «Բոհեմ» (Միմի), «Ծիծեռնակ» (Մագդա), «Տոսկա» (Տոսկա), «Չիո-Չիո-Սան» (Մադամ Բատերֆլայ), Բոյտոյի «Մեֆիստոֆել» (Մարգարիտ, Ելենա), Չայկովսկու «Պիկովայա դամա» (Լիզա), Վագների «Թռչող հոլանդացի» (Սենտա), նաև Ջ.Վերդիի տասներկու դերերը՝ «Տրավիատա» (Վիոլետա), «Օթելլո» (Դեզդեմոնա), «Աիդա» (Աիդա), «Տրուբադուր» (Լեոնորա), «Դոն Կարլոս» (Ելիզավետա), «Սիցիլիական ժամերգություն» (Ելենա), «Սիմոն Բոկանեգրա» (Ամելիա), «Էրնանի» (Էլվիրա), «Լեդի Մակբեթ» (Լեդի Մակբեթ), «Նաբուկկո» (Էբիգեյլ), «Աթիլլա» (Օդաբելլա), ինչպես նաև Ռեքվիեմը: 2009 թ-ից երգչուհու խաղացանկին ավելացել է Եղիսաբեթ Ա թագուհու դերը (Դոնիցետտիի «Ռոբերտո Դևերոյում», դեբյուտը` Դալլասի օպերայում): Մասնակցել է բազմաթիվ աշխարհահռչակ օպերային փառատոների:

Նա կատարումներ է ունեցել շատ նշանավոր դիրիժորների հետ, ինչպիսիք են Ռիկարդո Մուտին, Վալերի Գերգիևը, Ժորժ Պրետրեն, Միշել Պլասսոն, Մարսելո Վիոտտին, Մաուրիցիո Արենան, Մյունգ-Վհուն Չունգը, Գենադի Ռոժդեստվենսկին, Պլասիդո Դոմինգոն, Լեոնարդ Սլատկինը, Ջեյմս Մորիսը և Ջեյմս Կոնլոնը:

Իր մենահամերգների ժամանակ նա շատ ակտիվորեն ներկայացնում է նաև հայ կոմպոզիտորների երաժշտությունը՝ Կոմիտաս Վարդապետ, Երանյան, Կանաչյան, Չուխաճյան, Տիգրանյան, Ավետ Տերտերյան և Տիգրան Մանսուրյան:

2006 թ-ին թողարկել է թվային ձայնասկավառակ Կոմիտասի 36 երգերով՝ այդ թվում նաև գերմանական պոեզիայով գրված ինը երգերը, որոնք ընդհանրապես կատարվել են առաջին անգամ։

«Մեր ազգը, մեր հողը շատ բերրի է։ Ծնվում են տաղանդավոր երեխաներ։ Մենք ամեն իմաստով պետք է լինենք առաջնակարգ։ Եթե մի ուրիշ ազգի ներելի է միջակությունը, ապա մեզ` ոչ։ Նույնիսկ փողոցը անցնելիս պետք է ուշադիր լինենք, խոսելիս, շփվելիս։ Ամեն ինչում պետք է լինենք կատարյալ կրթված ու բարեկիրթ։ … Եվ ամենակարևորը՝ մեր լեզուն պահպանել, մեր լեզվամտածողությունը:…  Աշխարհին հավասարի իրավունքով պետք է ներկայանանք։ Մեզ պետք է քաղաքակիրթ ու արժանապատիվ միջոցներով հաղթել դիմացինին և մտնել համաշխարհային մշակութային կյանք»,- ասել է երգչուհին (orer.eu)։

Լուսանկարները՝ տարբեր աղբյուրներից: