Ձեր վստահելի աղբյուրը

«Հայաստանի Զինված ուժերը պաշտոնապես չեն ասել, որ մասնակցելու են ՆԱՏՕ-ի զորավարժություններին»,-լրագրողների հետ զրույցում հայտարարեց պաշտպանության փոխնախարար Արտակ Զաքարյանը:

Փոխնախարարի խոսքով, պաշտպանության նախարարությունը չի հաստատել, որ հայկական կողմն  անպայման մասնակցելու է. «Մենք մեր պաշտոնական համաձայնությունը չենք տվել մասնակցությանը»:

Հիշեցնենք, որ երեկ վրացական լրատվամիջոցները հայտարարեցին, որ Վրաստանում մեկնարկած ՆԱՏՕ-ի զորավարժություններին մասնկացելուց Հայաստանը հրաժարվել է վերջին պահին:

«Մեր պլանավորման մեջ որոշակի վերանայումներ են եղել, որոնք պայմանավորված են ամենատարբեր բաներով:  Ցանկացած ծրագրերում միշտ էլ վերանայումներ հնարավոր են: Ակեղծ ասած, տեղյակ չեմ, թե որտեղից են վերցրել  վրացի գործընկերները այդ հայտարարությունը»,-ասաց փոխնախարարը:

Ա. Զաքարյանի խոսքով, համապատասխան օղակները ճշտումներ կանեն, ինչին կհետևեն մեկնաբանությունները:

Նա ևս մեկ անգամ կոչ արեց, նման որոշման մեջ արտառոց որևէ բան չտեսնել, քանի որ ԶՈՒ սովորական գործունեություն է, վերանայումներ էլ արվում են:

«Խնդիրը զորավարժությունների կարևոր կամ անկարևոր լինելը չէ: Երկարաժամկետ պլանավորումները, կախված իրավիճակով, ԶՈՒ առաջև դրված խնդիրների առաջնահերթություններով, վերանայումներ են լինում»,-ասաց:

Փոխնախարարը բացառեց ՀԱՊԿ միջամտությունը նման որոշման կայացման գործում, ասաց՝ քաղաքական որևէ դրդապատճառ չկա.

«ՆԱՏՕ-ն եղել է, կա և շարունակելու է մնալ մեր գործընկերը, մենք ՀԱՊԿ-ի լիիրավ անդամ ենք և մեր անվտանգության ամենագլխավոր հովանոցը ՀԱՊԿ համակարգում ենք տեսնում: Որոշումներ կայացնողները շատ լավ գիտակցում են ամեն բան, ծանր ու թեթև են անում»: