Ձեր վստահելի աղբյուրը

Վրաստանում ՆԱՏՕ-ի զորավարժություններին չմասնակցելու վերաբերյալ Հայաստանի որոշումը, ըստ պաշտպանության փոխնախարար Արտակ Զաքարյանի, արտառոց բան չպետք է դիտարկել: Փոխնախարարի խոսքով,  ՆԱՏՕ-ի զորավարժություններին չմասնակցելը չի նշանակում, որ Հայաստանի գործընկերության մակարդակը ինչ-որ առումով նվազում կամ ավելանում է մեկ այլ օղակի հաշվին։

«Գաղտնիք չէ, որ ՀՀ զինված ուժերը և ընդհանուր անվտանգային համակարգը ՀԱՊԿ համակարգում ունի շատ կարևոր դերակատարություն և ՀԱՊԿ-ի դերակատարությունը ՀՀ անվտանգային համակարգի համար կարևոր և առանցքային նշանակություն ունի։ Գաղտնիք չէ, որ Հայաստանը շատ երկար ժամանակ և՛ քաղաքական, և՛ ժողովրդավարական ինստիտուտների զարգացման, և՛ խաղաղարար առաքելության իրականացման շրջանակներում ունի լայն համագործակցություն ՆԱՏՕ-ի կառույցի և անդամ երկրների հետ։ Այստեղ մի միջոցառմանը չմասնակցելը կամ մասնակցելը նույնիսկ արտառոց չպետք է դիտարկել», -ասաց Արտակ Զաքարյանը։

Նա այսօր մասնակցում էր  Երևանում անցկացվող «Հակառակորդի ռազմաքաղաքական մարտավարությունն ու մեր անելիքները» թեմայով խորհրդաժողովին:

ՀՅԴ Բյուրոյի անդամ Հրանտ Մարգարյանն էլ անդրադառնալով հարցին, կարծիք հայտնեց, որ չմասնակցելով Հայասանը չի կորցնում է իր դերն ու նշանակությունը:

«Համոզված եմ, որ Հայաստանը գտնվում է ինչ-որ ռազմաքաղաքական ճամբարի մեջ, յուրաքանչյուր երկիր մտնում է նման ռազմաքաղաքական դաշինքի մեջ: Ճիշտ է, որ մենք չենք փորձում խզել և հակադրվել մյուս ճամբարների հետ, բայց, վերջիվերջո, այդ իրողությունը մեզանից պահանջում է որոշակի կեցվածք»,-ասաց դաշնակցական գործիչը:

Նրա խոսքով, Հայաստանն անկախ երկիր է և կարող է որոշել՝ ինչին մասնակցել, ինչին՝ ոչ:

«Նույնիսկ կարելի է վերջին պահին հրաժարվել»,-ասաց նա՝ կարծիք հայտնելով, որ չմասնակցելու որոշումը կայացրել է Հայաստանը: