Ձեր վստահելի աղբյուրը

«Երևանում նախադպրոցական կրթության կազմակերպման գործընթացում առկա  որոշ անօրինական  քայլեր կան»: Այդպես է համարում Երևանի ավագանու «Ելք» խմբակցության անդամ Անհաիտ Բախշյանը:

Նա տարածել է հայտարարություն, որտեղ մեջբերում է «Նախադպրոցական կրթության մասին» օրենքի դրույթները, ընդգծում, որ իրավասու մարմնի որոշումների վերանայման անհրաժեշտություն կա:

Անահիտ Բախշյանն ընդգծում է, ՀՀ-ում ԱԺ-ի կողմից ընդունված այս օրենքն ասում է, որ  նախադպրոցական տարիքի երեխաներն ունեն նախադպրոցական կրթություն ստանալու հավասար իրավունք, որ ՀՀ-ում նախադպրոցական տարիքը սահմանված է 0-6 տարեկան, որ այդ կրթությունը կազմակերպելը Երևանի համայնքի պարտավորությունն է, որ այդ երեխաների հաշվառումը, այսինքն՝ ըստ տարիքի հերթագրումը, նույնպես քաղաքապետարանի աշխատակազմի պարտավորությունն է  ու քաղաքապետարանի աշխատակազմն իրավունք չունի օրենքով իր վրա դրված լիազորությունները կամայականորեն շրջանցել կամ չիրականացնել:

«Ավելին, վերոնշյալ օրենքի 23-րդ հոդվածի  համաձայն,  ծնողն է որոշում, թե իր երեխան նախադպրոցական կրթությունը ստանա ընտանիքում, մանկապարտեզում թե այդ նպատակի համար նախատեսված այլ հաստատություններում, որը նշանակում է, որ ծնողն է որոշում ե՞րբ հերթագրել երեխային, իհարկե համայնքի ստեղծած հնարավորությունների սահմաններում: Ո՛չ մի տեղ չի գրված, որ երեխան մանկապարտեզ է գնում միայն ծնողի աշխատելու դեպքում, որի պահանջը հաճախ դառնում է  երեխային մանկապարտեզ  չընդունելու պատրվակ կամ մանկապարտեզում օրենքով սահմանված չէ ուսումնական տարվա սկիզբ ու ավարտ»,-նշված է հայտարարության մեջ:

Նա հավելում է, որ նույն օրենքի 16-րդ հոդվածի 2-րդ կետն ասում է. «Իրենց լիազորությունների սահմաններում կրթության պետական կառավարման լիազորված մարմնի ընդունած իրավական ակտերը ենթակա են պարտադիր կատարման նախադպրոցական կրթության կառավարման ոլորտի լիազորություններ ունեցող պետական կառավարման և տեղական ինքնակառավարման մարմինների կողմից»:

Երևանի ավագանու անդամը տեղեկացնում է, որ  Երևանի մանկապարտեզներում  երեխաների  հաշվառման, հերթագրման  և ընդունելության  գործընթացում առկա անհիմն որոշումների  վերանայման և  օպտիմալացված  դպրոցներում   ուսումնական  գործընթացի կազմակերպման   հետ  կապված  խնդիրների քննարկման   առաջարկով  դիմել  է Երևանի ավագանու Կրթության, մշակույթի, սոցիալական, տուրիզմի  մշտական հանձնաժողովի նախագահ Արայիկ Հարությունյանին, այս հարցերը քննարկելու նպատակով  հրավիրել հանձնաժողովի նիստ, որին   Երևանի Ավագանու կանոնակարգի 78-րդ կետի համաձայն,  կհրավիրվեն քննարկվող հարցերին առնչվող փոխքաղաքապետ պարոն Սուքիասյանն ու քաղաքապետարանի աշխատակազմի կրթության վարչության պետ Աննա Ստեփանյանը: