Ձեր վստահելի աղբյուրը

Մեկ տարի առաջ Երևանում  ծնված քառյակի ընտանիքում սեպտեմբերի 3-ին կրկնակի տոն էր: Իրենց  ծննդյան օրը՝  փոքրիկ Մայիսը, Նարեկը, Դայանան և Մանանան մկրտվել են: Սուրբ մկրտությունը տեղի է ունեցել Տաթևի վանքում:

Քառյակի երջանիկ մայրը՝ Մարիամ Թունյանը, Panorama.am-ի թղթակցի հետ զրույցում ասաց, որ մկրտության արարողությանը մասնակցել են ընտանիքի հարազատները, որոնք ժամանել են ոչ միայն Երևանից,  այլև արտերկրից: Հրավիրյալների շարքում են եղել նաև Պերինատոլոգիայի, մանկաբարձության ու գինեկոլոգիայի ինստիտուտի բժիշկները, որոնց շնորհիվ լույս աշխարհ է եկել քառյակը: Իր կատարումներով փոքրիկներին շնորհավորել է Ռուբեն Հախվերդյանը:

«Ինչպես ծրագրել էի, այդպես էլ եղավ: Հիմա մտածում եմ՝ ինչպես կարողացա այդ ամենը կազմակերպել, իսկական հեքիաթ էր»,- նշեց Մարիամը:

Հիշեցնենք, որ քառյակը լույս աշխարհ է եկել 2016 թվականի սեպտեմբերի 3-ին Երևանի Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտում` բնական ճանապարհով: Քառյակի ծնունդը բժիշկները հրաշք են համարում, քանի որ բնական ճանապարհով` ոչ արհեստական բեղմնավորմամբ, քառյակ լույս աշխարհ բերելը բացառիկ երևույթ է համարվում: Նշենք, որ Մարիամ Թունյանի  առաջնեկը 5-ամյա Աշխենն է, որը մայրիկի օգնականն է և հոգ է տանում քույրերի ու եղբայրների մասին:

Մարիամն ասում է, որ իրեն օգնում է մի մեծ բանակ՝ տատիկները, հորաքույրներն ու մորաքույրները, բարեկամները, ինչպես նաև դայակը, որին համարում է երեխաների երրորդ տատիկ. «Երեխաներս շրջապատված են հոգատարությամբ ու ջերմությամբ:
Եթե տեսնում եմ, որ նրանք առողջ են, ամեն ինչ լավ է ընտանիքում, ես ինձ աշխարհի ամենաերջանիկ մարդն եմ համարում»:

Խոսելով առօրյա հոգսերից՝  բազմազավակ  մայրն ասում է, որ  մեկ տարվա ընթացքում հաճելի զգացողությունն ու տպավորություններն այնքան շատ էին, որ չի էլ հասցնում հոգսերը նկատել. «Երեխաներիս ծնունդով լիովին փոխվել է մեր կյանքի ռիթմը: Թեկուզ այդքան զբաղված եմ, բայց հոգնածություն չեմ զգում: Եթե երեխան առողջ է մեծանում, դժվարություններն արդեն աչքիդ չեն երևում: Կարևորը՝ առողջ լինեն, ես միայն դրա մասին եմ մտածում»: 

Նշենք, որ քառյակի լույս աշխարհ գալուց կարճ ժամանակ անց լրատվամիջոցներում լուրեր տարածվեցին, որ ընտանիքին, իբր, բնակարան են նվիրել: Մինչդեռ այդ լուրերն իրականությանը չեն համապատասխանում: Նրանք ոչ մի օգնություն պետությունից կամ պաշտոնյաներից չեն ստացել: Մարիամին և քառյակին նվերներ է մատուցել միայն Կաթողիկոսը, աջակցել են մարզպետարանից ու Գորիսի քաղաքապետարանից, իսկ երեխաների հագուստը Ամերիկայից նրանց հորաքույրն է ուղարկում:

«Ինձ ոչինչ պետք չէ, միան թող բալիկներս առողջ լինեն: Փառք Աստծո, նպաստառու չենք, անապահով ընտանիք չենք, բոլորն աշխատում են, միասին  հաշտ-համերաշխ երեխաներիս մեծացնում ենք: Իմ հինգ երեխաները մեր հարստությունն են, Աստծո պարգև, թող բոլոր ընտանիքներն այս երջանկությունն ապրեն»,- ասում է Մարիամը: 

Նշենք, որ Մարիամը մասնագիտությամբ ինժեներն է, ամուսինը՝ տնտեսագետ: Նրանք ապրում են Գորիսում, ամուսնու ծնողների հետ: