Ձեր վստահելի աղբյուրը

«Հայկական օպերային, բալետային ներկայացումները կարելի է ցուցադրել Հայաստանից դուրս, երբ լինեն իդեալական վիճակում»,- լրագրողների հետ հանդիպմանն ասաց Սպենդիարյանի անվան օպերայի և բալետի ազգային ակադեմիական  թատրոնի տնօրեն և գեղարվեստական ղեկավար, ՌԴ վաստակավոր արտիստ Կոնստանտին Օրբելյանը՝ պատասխանելով հարցին, թե արդյոք թատրոնը չի ծրագրում հայկական ազգային օպերային, բալետային ներկայացումները ցուցադրել դրսում: 

Կ. Օրբելյանն օրինակի համար նշեց, որ խորհուրդ չի տա Ա.Տիգրանյանի «Անուշ» օպերան այսօրվա բեմադրությամբ ներկայացնել դրսում:

««Անուշ», «Դավիթ Բեկ», «Ալմաստ», ...Պետք է նոր բեմադրություններ անենք, վերստեղծենք այն լավը, ինչ նախկինում արված ներկայացումներում կային, ավելացնել նոր բաներ»,- հավելեց նա:

Խոսելով ֆրանսահայ մեծանուն շանսոնյե Շառլ Ազնավուրին նվիրված «Լա Բոհեմ» մեկ գործողությամբ բալետային ներկայացումը  այլ երկրներում ներկայացնելու մասին, Կ.Օրբելյանը տեղեկացրեց, որ բեմադրության սցենարի հեղինակ և բեմադրող խորեոգրաֆ  Ռուդոլֆ Խառատյանն այժմ բանակցություններ է վարում: Նա նաև նշեց, որ թատրոնի գեղարվեստական խուրհուրդը, նախարարությունն արդեն հավանության են տվել, Ռ. Խառատյանը ստեղծելու է նաև ֆրանսիացի երաժիշտ, կոմպոզիտոր, գործիքավորող, դաշնակահար, ՀՀ  Պատվո շքանշանի ասպետ, Միշել Լեգրանի երաժշտության  հիման վրա բալետային ներկայացում:

«Ազնավուր-Լեգրան, շատ լավ զույգ է: Ինձ թվում է շատ հետաքրքիր կլինի ոչ միայն հայերի, այլ այդ կոմպոզիտորների միլիոնավոր երկրպագուներին, ովքեր մեծ բավականություն կստանան»,- ասաց Կ. Օրբելյանը: