Ձեր վստահելի աղբյուրը

ՀՀ աշխատանքի և սոցիալական հարցերի նախարարությունն, իր նոր նախագծով առաջարկում է հաշմանդամի սայլակներ և լսողական սարքեր տրամադրել հավաստագրերի հիման վրա: Այս մասին որոշման նախագիծն ընդգրկված է ՀՀ կառավարության սեպտեմբերի 7-ի նիստում:

Նախագծով առաջարկվում է 2017 թվականին հաշմանդամի սայլակի ձեռքբերման մեկ պետական հավաստագրի գնային արժեքը սահմանել  95 հազար դրամ, իսկ  30 տարեկան և ավելի բարձր տարիքի  հաշմանդամություն ունեցող, տարիքային կենսաթոշակի իրավունք տվող տարիքը լրացած անձանց համար լսողական սարքի ձեռքբերման մեկ պետական հավաստագրի գնային արժեքը` 30 հազար դրամ:

Լսողության խնդիրներ ունեցող 12-18 տարեկան երեխաներին և 18-ից մինչև 29 տարեկան հաշմանդամություն ունեցող անձանց համար լսողական սարքի ձեռքբերման մեկ պետական հավաստագրի գնային արժեքն էլ կկազմի 80 հազար դրամ:

Ըստ նախագծի հիմնավորման՝ ներկայումս պրոթեզաօրթոպեդիկ և վերականգնողական պարագաները, այդ թվում հաշմանդամի սայլակների և լսողական սարքերի  ձեռքբերման գործընթացն իրականացվում է գնումների մասին օրենսդրությանը համապատասխան: Դրա շրջանակներում, յուրաքանչյուր տարի նախապես մշակվում են սայլակի և լսողական սարքի տեխնիկական բնութագրերը, որոնց հիման վրա էլ  կազմակերպվում են  գնման ընթացակարգերը: Մրցույթի արդյունքում հաղթած կազմակերպությունների հետ կնքված պայմանագրերի պահանջների համաձայն (որի բաղկացուցիչ մասն են տեխնիկական բնութագրերը)` մատուցվում են համապատասխան ծառայությունները:

Չնայած նախարարությունը պարբերաբար վերանայում և հստակեցնում է տեխնիկական բնութագրերը, ընդլայնում պարագաների տեսականին, այնուամենայնիվ, դրանք ամբողջովին համարժեք չեն լինում հաշմանդամություն ունեցող անձի կարիքին՝ նրա առողջական, ֆունկցիոնալ, անհատական և այլ գործոններից ելնելով, որը հաճախ տեղիք է տալիս նրանց արդարացի դժգոհություններին: Արդյունքում, չնայած պետական բյուջեի միջոցներից յուրաքանչյուր տարի հատկացվում են մեծ գումարներ սայլակի և լսողական սարքի  տրամադրման համար, այնուամենայնիվ, գործընթացի արդյունավետությունը մնում է ցածր: 

Այս նախագծով առաջարկվում է հաշմանդամի սայլակը և լսողական սարքը  տրամադրել հավաստագրերի հիման վրա՝ հնարավորություն տալով հաշմանդամություն ունեցող անձին ձեռք բերել իր կարիքին համարժեք սայլակ կամ լսողական սարք: 

Եթե անձը նախընտրում է ձեռք բերել սայլակ կամ լսողական սարք, որն ավելի թանկ արժե, քան հավաստագրի գնային արժեքն է, ապա նա իր միջոցներից կարող է վճարել  գների միջև եղած տարբերությունը:

Եթե անձը նախընտրում է ձեռք բերել ավելի էժան սայլակ կամ լսողական սարք, քան  հավաստագրի գնային արժեքն է, նախագծով առաջարկվում է հավաստագրի  ավելացած գնային արժեքի սահմաններում նրան տրամադրել այլ պահեստամասեր կամ հարակից պարագաներ (լրացուցիչ անիվներ, ոտնակներ, հակախոցային բարձիկներ, մարտկոցներ և այլն), որոնք օգտագործվում են պարագայի ֆունկցիոնալությունը, երկարակեցությունն կամ անձի հարմարավետությունն ապահովելու համար:

Միաժամանակ, հաշմանդամի  սայլակի ձեռքբերման հավաստագրի յուրաքանչյուր չօգտագործված տարվա համար հավաստագրի գնային արժեքը ավելանում է 25 տոկոսի չափով: Սա կնպաստի, որպեսզի շահառուն ավելի խնամքով օգտագործի սայլակը, ինչը կնվազեցնի անհարկի դիմելիությունը։