Ձեր վստահելի աղբյուրը

«Խոսակցությունները, որ Հայաստանը ՆԱՏՕ-ի զորավարժությունների մասնակցությունից հրաժարվել է ռուսական կողմի ճնշումների ներքո, ընդամենը կարծիք են: Խնդիրը կայանում է  նրանում՝ արդյոք ունենք այս պնդումները հաստատող փաստարկներ: Մասնավոր կարծիք են նաև այն խոսակցությունները, որ Հայաստանը Վրաստանում կայանալիք զորավարժություններին չի մասնակցել, քանի որ դրանց մասնակցում էր Ադրբեջանը»,-լրագրողների հետ այսօր կայացած հանդիպման ժամանակ նման տեսակետ հայտնեց քաղաքագետ Ալեքսանդր Մարկարովը՝ հիշեցնելով, որ Պաշտպանության նախարարությունը թեմայի շուրջ հանդես է եկել պաշտոնական պարզաբանմամբ:

Անդրադառնալով Հայաստանի և Ադրբեջանի արտգործնախարարների՝ առաջիկայում կայանալիք հանդիպմանը՝ բանախոսը նկատեց՝ սա հերթական փորձն է ճշտելու կողմերի մոտ առկա մոտեցումները: Ավելին, ակնկալել, որ այդ հանդիպումից հետո Արցախյան հակամարտության կարգավորման տեսանկյունից լուրջ առաջընթաց կգրանցվի, ճիշտ չի լինի:

«Լուծման որոնումը շարունակվում է երկու տասնամյակից ավելի: Ինչպես հայտնի է, երկու կողմերին բավարարող լուծում առայժմ չի գտնվել: Իսկ նվազագույնը, ինչին ձգտում են ԵԱՀԿ Մինսկի խմբի համանախագահները, եղած պայմանավորվածությունները կյանքի կոչելն է»,- ասաց քաղաքագետը:

Բանախոսն ընդգծեց, որ երբ ԵԱՀԿ Մինսկի խումբը հասցեական կերպով չի արձագանքում ադրբեջանական կողմի սադրանքներին և դիտորդական առաքելության իրականացման պահին արձակած կրակոցներին, միայն խրախուսում է ագրեսորին: