Ձեր վստահելի աղբյուրը

Այս օրերին մասնավոր այցով Հայաստանում էր խորհրդային ճանաչված աթլետ, հեռացատկի աշխարհի կրկնակի ռեկորդակիր, օլիմպիական խաղերի կրկնակի բրոնզե մեդալակիր, Եվրոպայի եռակի չեմպիոն Իգոր Տեր-Հովհաննիսյանը:

Լեգենդար մարզիկը եկել էր հեռացատկի Եվրոպայի ռեկորդակիր Ռոբերտ Էմմիյանի հրավերով, որի՝ 1987 թվականին Ծաղկաձորում սահմանած ռեկորդը (8 մ, 86 սմ), մինչև այժմ Եվրոպայում գերազանցված չէ: Աշխարհում այս արդյունքը դեռ չորրորդն է: Այս տարի Էմմիյանի ռեկորդային ցատկի 30-ամյակն է, և այդ կապակցությամբ մարզիկի հայրենիք Գյումրիում կայացավ նրա անվան միջազգային մրցաշար: Պատվավոր հյուր էր նաև Իգոր Տեր-Հովհաննիսյանը, որը հաջորդ տարի պատրաստվում է նշել 80-ամյակը:

ՀԱՕԿ լրատվականի հետ զրույցում Իգոր Տեր-Հովհաննիսյանն ասել է, որ Հայաստանի հետ իրեն վաղեմի հարաբերություններն են կապում: Նրա հայրը՝ պրոֆեսոր Արամ Տեր-Հովհաննիսյանը, մարզական մանկավարժության հիմնադիրներից է:

«1945 թվականին, երբ ես 7 տարեկան էի, մենք Երևան եկանք: Հայրս այստեղ էր աշխատում, Հայաստանի ֆիզիկական կուլտուրայի և սպորտի պետական ինստիտուտի թեթև աթլետիկայի ամբիոնի վարիչն էր, ինչպես նաև հանրապետության հավաքականի գլխավոր մարզիչը: Ավելի ուշ Մոսկվա տեղափոխվեցինք, որտեղ հայրս շարունակեց գիտությամբ զբաղվել, իսկ ես սկսեցի մարզվել»,-պատմել է նա:

Աշխարհի ռեկորդներից մեկը (8 մ 31 սմ) Իգոր Տեր-Հովհաննիսյանը (Արամովիչ) սահմանել է 1962 թվականին Երևանում: Իսկ վեց տարի անց Լենինականում ցատկել է 8 մ 28 սմ (չորրորդ արդյունքը կարիերայի ընթացքում):

Լեգենդար մարզիկը լավագույն արդյունքը ցույց է տվել 1967 թվականին Մեքսիկայում (8 մ 35 սմ): Ի դեպ, 1967 թվականից Եվրոպայի ձմեռային ռեկորդը պատկանում էր հենց Տեր-Հովհաննիսյանին, որը 1986-ին Մոսկվայում գերազանցեց Ռոբերտ Էմմիյանը: Այնպես որ, աթլետիկայի այս մրցաձևում հայերն արդեն հիսուն տարի իրենց ձեռքում են պահում մայրցամաքի բարձրագույն նվաճումը:

«Հաջորդ տարի կլրանա 80-ամյակս: Ինձ շատ լավ եմ զգում: Աղջիկս՝ Մարիան, ևս հեռացատկով է զբաղվում, չնայած վերջերս ոլորել է ոտքը և առայժմ չի մարզվում: Հենց որ ցատկի 6 մ 50 սմ, կսկսի հանդես գալ Հայաստանի դրոշի ներքո»,- ժպիտով խոստացավ Տեր-Հովհաննիսյանը: