Ձեր վստահելի աղբյուրը

Մեկ տարի առաջ Արցախում ծանր վիրավորված զինծառայող Հովհաննես Պողոսյանը  սեպտեմբերի վերջին գանգոսկրի պրոթեզավորման բարդ վիրահատության կենթարկվի: Այս մասին Panorama.am-ի թղթակցի հետ զրույցում ասաց Հովհաննեսի մայրը՝ Գայանե Ասատրյանը:

Նրա խոսքերով՝ վիրահատությունը կատարելու է վիրաբույժ Արման Հակոբյանը: «Հիանալի բժիշկ է, ես համաձայն չէի, որ Հովհաննեսին արտերկիր տանեին, Արման Պարգևիչը լավ մասնագետ է և ես միայն իրեն եմ վստահում»,-  նշեց տիկին Գայանեն՝ հավելելով, որ վիրաբույժը մասնակցել է Հովհաննեսի վիրահատություններին և գիտի, թե որդու մոտ ինչ խնդիրներ կան:

Հիշեցնենք, որ ամիսներ առաջ կատարվել է Հովհաննեսի գանգի եռաչափ մոդելավորում, որպեսզի պլաստիկան կատարելու համար ստանան գլխի ձևաչափը: Մոդելը, որ պատվիրվել է Իտալիայից, արդեն պատրաստ է:

Տիկին Գայանեի խոսքերով՝ Հովհաննեսը  վստահ է, որ վիրահատությունը լավ կանցնի. «Ես եմ մտահոգ: Շատ բարդ վիրահատություն է լինելու, Աստված եմ կանչում, ամեն օր աղոթում եմ, որ Հովհաննեսս  դիմանա, էդ մի քանի ժամն էլ անցկացնի  ու էլ բան չեմ ուզում»:

Ընդհանուր առմամբ, ըստ Գայանե Ասատրյանի, որդու առողջական վիճակում դրական փոփոխություններ կան, հիշողությունն  աստիճանաբար վերականգնվում է, փորձում է տառերը վերհիշել: Հովհաննեսը աջ ձեռքը դեռ չի կարողանում շարժել, մայրը վստահ է, որ մի օր այդ խնդիրն էլ կլուծվի:

1995թ. ծնված Հովհաննես Պողոսյանը 2016 թվականի մայիսի 13-ին Թալիշում ստացել է գանգուղեղի հրազենային ծանր վիրավորում, գլխուղեղի սալջարդ, այլ բազմաբեկորային կոտրվածքներ։ Վիրավորում ստանալուց հետո զինծառայողը տեղափոխվել էր Մարտակերտի հոսպիտալ, վիրահատվել, ապա տեղափոխվել Ստեփանակերտի հոսպիտալ, իսկ հետո՝ Երևան: Սա Հովհաննեսի երկրորդ վիրավորումն է: Առաջին անգամ վիրավորում ստանալուց հետո նորից, կամավոր, դիրքեր էր բարձրացրել:

Նշենք նաև, որ Հովհաննեսը  28 օր եղել է կոմայում, 36-րդ օրը  վերակենդանացման բաժանմունքից տեղափոխվել է հիվանդասենյակ, 105 օր մնացել է հոսպիտալում:   Հովհաննեսը գլխի երեք վիրահատություն է ունեցել՝ մեկը Արցախում,  երկուսը՝ Երևանում։