Ձեր վստահելի աղբյուրը

Միջնորդները միշտ փորձում են հասցեական հայտարարություններ չանել, չնայած կան բացառություններ։ Լրագրողների հետ զրույցում ասաց ասաց  ՀՀ արտաքին գործերի փոխնախարար Շավարշ Քոչարյանը` պատասխանելով հարցին, թե ինչպե՞ս կմեկնաբանեք ԵԱՀԿ գործող նախագահի անձնական ներկայացուցիչ Անջեյ Կասպշիկի այն հայտարարությունը, թե իրենք չեն հասկացել՝ Հայաստան-Ադրբեջան պետական սահմանին  ԵԱՀԿ մոնիտորինգի ընթացքում որտեղից էին կրակում:

Փոխնախարարի խոսքով, առաջարկվող հետաքննության մեխանիզմը հենց դրան է ուղղված, որպեսզի լինեն հասցեական հայտարությունները, ոչ թե միջնորդը դա ասի, այլ համապատասխան  հետաքննող  հանձնաժողովը կարողանա հասցեական ասել:

«Պատահական չէ, որ Ադրբեջանը խոչընդոտում է այդ մեխանիզմի ձևավորմանը, չնայած այդ պարտավորությունը ստանձնել էր Վիեննայում, Սանկտ Պետերբուրգում»,- ասաց  Շ. Քոչարյանը՝ հավելով, որ  Ադրբեջանն անընդհատ չարաշահում է միջնորդների հավասարակշիռ մոտեցումը, ավելին՝ վրդովվում է, երբ դուրս են գալիս հավասարակշռությունից։

«Բնական է, եթե անհասցե են հայտարարությունները, դա ավելի շատ խրախուսում է Ադրբեջանին դիմել այդ քայլերին։ Մյուս կողմից՝ Ադրբեջանը դա էլ անում է, բայց նաև տեսնում ենք, որ բոլոր ոլորտներում կտրվում է միջազգային խաղի կանոններից, գնալով երկիր է դառնում, որն, ըստ էության, մեկուսանում է միջազգային խաղի կանոններից: Դա մեզ համար կարևոր է, բայց մյուս կողմից մենք դրանով չպետք է մեզ ապահով զգանք, որովհետև առաջին հերթին պետք է ապավիենք մեր ուժերին»,- ասաց ԱԳ փոխնախարարը:

Միաժամանակ նա նշեց, որ անհասցեականության նժարը թեքվում է դեպի Ադրբեջանի քննադատություն. «Ցանկալի կլիներ, որ միջնորդները միանգամից ասեին՝ Ադրբեջանն է, բայց դա պրակտիկայում ընդունված չէ»:

Ինչ վերաբերում է  ՀՅԴ այն առաջարկին, որ Հայաստանը պետք է միակողմանի իրականացնի Վիեննայի և Սանկտ Պետերբուրգի պայմանավորվածությունները և իր կողմում տեսադիտարկվող սարքեր տեղադրի, Շ. Քոչարյանն ասաց. «Այսօր էլ ամբողջ շփման գծում կան սարքեր, որոնք նկարահանում են բոլորը։ Խնդիրը նկարահանման մեջ չէ։ Ասեմ ավելին, նույն միջնորդ պետություններն այն պետություններն են, որոնք հնարավորություն ունեն այդ ամենը տիեզերքից դիտարկելու: Խնդիրը վերաբերում է ոչ թե արձանագրելուն, այլ այն լիազորված խմբին, որը դրա հիման վրա համապատասխան հետևություններ անի»,- ասաց Շ.Քոչարյանը: