Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվում է ՊՊԾ գնդի գրավմանը մասնակցած խմբից 14 անդամների՝  Աշոտ Պետրոսյան, Արայիկ Խանդոյան, Արեգ Կյուրեղյան, Արմեն Բիլյան, Արմեն Լամբարյան, Գագիկ Եղիազարյան, Էդվարդ Գրիգորյան, Մխիթար Ավետիսյան, Պավել Մանուկյան, Սեդրակ Նազարյան, Սմբատ Բարսեղյան, Վարուժան Ավետիսյան, Կարո Եղնուկյան, Խաչատուր Գիչյան, գործով դատական նիստը:

Այն նախապես հայտարարված ժամից՝ 11:00-ից, ուշ սկսվեց: Մի քանի ամբաստանյալների պաշտպաններ չկարողացան մուտք գործել նիստերի դահլիճ, քանի որ հրաժարվեցին բացել և ցույց տալ պայուսակների պարունակությունը կարգադրիչներին: Նրանց թույլ չտվեցին մուտք գործել նիստերի դահլիճ:

Դատական նիստի հենց մեկնարկին դատական սանկցիա կիրառվեց ամբաստանյալներից Արայիկ Խանդոյանի նկատմամբ:

«Վերջին անգամ եմ նախազգուշացնում, եթե տեղից որևէ ռեպլիկ անեք, կկիրառեմ դատական սանկցիա՝ ավելի ծանր»,- հայտարարեց դատավոր Արտուշ Գաբրիելյանը:

Ա. Խանդոյանը շարունակեց խոսել:

«Հաշվի առնելով այն հանգամանքը, որ շարունակում եք խանգարել դատական նիստը, դատարանը ձեր նկատմամբ դատական սանկցիա է կիրառում՝ հեռացում նիստերի դահլիճից: Կարող եք հեռացնել»,- հայտարարեց դատավորը:

Ա. Խանդոյանի փաստաբան Արա Ղարագյոզյանն ասաց, որ իր պաշտպանյալը ջուր է ցանկանում, քանի որ առողջական խնդիրներ ունի:

«Խնդրում եմ իրավական հիմքերը նշելը, թե ի՞նչ հիմքով եք հեռացնում»,- հարցրեց փաստաբանը դատավորից:

«Դատական նիստը խանգարելու համար»,- նշեց դատավոր Ա. Գաբրիելյանը:

Այնուհետև, դատավորը հայտարարեց, որ նիստը 45 րոպեով ընդմիջվում է: Դատարանը գնաց խորհրդակցական սենյակ՝ քննարկելու փաստաբանների զննության հետ կապված արձանագրությունները, ովքեր հրաժարվել էին բացել և ցուցադրել իրենց պայուսակների պարունակությունը կարգադրիչներին: